霸戲哥之日常#250｜ 深海陰謀

之前講過，霸戲哥讀U嗰陣主修ecology，畢業篇論文又係寫關於魚嘅，自問對海洋生態比一般人算係多啲認識咁啦。但原來，我哋喺書本上讀到嘅理論，包括甚麼sustainabilty，即可持續乜乜嗰啲，全部都係口號，係bullshit嚟！

最近無意中喺Netflix搵到套紀錄片《Seaspiracy》（深海陰謀）嚟睇，完全顛覆晒晝本上嘅概念，直情睇到無言。紀錄片先講啲大家都聽過嘅陰謀，好似成日都有報道講日本仔大規模圍捕鯨魚同海豚，手法極之殘忍。但究竟點解要大圍捕？貪佢哋啲肉賣到錢？

原來，鯨魚同海豚都係人類嘅「competitor」，因為佢哋會獵食「賣錢」嘅吞拿魚。換句話講，撲殺海豚、將佢哋維持喺低嘅population，有助人類捕捉更多吞拿，從而賺取更多金錢。

更意想不到嘅陰謀，居然係來自環保團體。我哋成日聽到環團呼籲減少海洋垃圾，成日講「走塑」，但數據話畀我哋知，每年誤吞塑膠而死嘅海洋生物，係遠遠低於誤吞捕魚器具，包括魚網！環團嘅作用就係負責帶風向，將殺死海洋生物嘅真相，spin咗去「塑膠」度。

至於環團叫喊嘅甚麼「Sustainable Fishing」，其實比政棍嗌嘅口號更廢更可恥。用懶政治正確嘅概念包裝，博善信、甚至捕魚機構課金，手法低劣。說穿了，呢個世界根本就冇「可持續捕魚」，只要人類一日唔停止瘋狂捕獵，海洋生物始終會有滅絕嘅一日。

電影又話，照今日進度，海洋生態最多捱到2050年，大家知驚未？

霸戲哥

** 博客文章文責自負,不代表本公司立場 **

八十年代專演奸角嘅資深演員沈威，今日傳出死訊，終年71歲。

同豬視妹傾開，先知沈威原來係佢成長時期嘅噩夢，凡有佢演出嘅戲，豬視妹都唔太夠膽睇。或者佢腦海lock住咗沈威喺《義蓋雲天》入面虐待王祖賢嘅畫面啩。

霸戲哥印象最深，當然係沈威喺《省港旗兵》入面飾演出賣班大圈仔嘅阿泰啦。有人話沈威喺架車度畀火燒嗰幕，係導演麥當雄出蠱惑呃佢拍嘅，佢事前完全唔知麥當雄癲到真係搵火燒，所以喺戲入面七情上面都係出於自然反應。盛傳沈威good take完即刻衝去立刀追斬麥當雄，都唔知真定假。

一個演員能夠令觀眾咁怕佢，絕對係非常成功。只可惜八十年代嘅奸角，好似大傻成奎安、大咪何家駒、基哥李兆基咁，都先後離開人世，只能夠喺電影中重溫佢哋嘅風采。