博客文章
6月20日除咗係J2重啟嘅大日子，仲係世界難民日。為咗響應呢個特別日子，聯合國難民署喺呢段時間舉行「第15屆慈善難民電影節」，而今屆主題係「㝷求安全的權利」。
經過二次大戰洗禮，難民問題非常嚴重，聯合國喺1951年通過咗《關於難民地位的公約》，世界難民保障嘅體系得以確立。直至上世紀九十年代戰亂頻繁，全球難民數量超過2000萬人，聯合國喺2000年通過決議，決定喺2001年起，將6月20日定為世界難民日。
講番個電影節，主辦單位精選左多部關於難民嘅電影同短片，包括《無處安心》、《飄盪青春》、《漂流：羅興亞故事》等，安排喺線上同戲院放映。
大家只需要去指定專頁，捐款港幣$100即可換領網上戲票一張，捐港幣$350可以換領網上電影節通行證，喺電影節舉行期間喺網上觀看所有精選影片。（片list在文尾）
今屆慈善難民電影節目標係籌到20萬，善款將會用喺支援烏克蘭危機緊急救援項目。又可以睇戲，又幫助到難民，仲唔快啲買飛？
霸戲哥
** 博客文章文責自負,不代表本公司立場 **
常言十套Netflix九套伏，霸戲哥就係死唔信邪，反正哥有的是時間。
近日有齣由雷神Chris Hemsworth老婆Elsa Pataky孭飛嘅電影《終極攔截戰》（Interceptor）上架，雖然外國評論一面倒負評，但喺Netflix觀看排行榜一直高鋸前十（仲試過榜首），我諗點差有個譜啩。
故事講恐怖分子精心策劃咗六年，同俄羅斯嘅叛亂分子合作（又係俄羅斯），偷咗16枚核彈，準備射向美國16座城市，當然有華盛頓份啦。美國有兩個導彈攔截基地，一個已經被攻陷，另一個呢就由Elsa死守。
一套關乎全美國，甚至係全球安全嘅戲，斷估都會牽涉好多國家或組織介入，點睇都似大片格局。殊不知套戲唔知係咪唔夠budget，出現嘅大型場景只得兩個：一個當然係攔截基地啦，而另一個就係呢類電影必然出現嘅指揮中心，但班總統參謀軍官除咗阿支阿左之外，係乜都幫唔到手。
簡單鋪排咗背景，接住落嚟就係無腦可言嘅Elsa個人表演，包括脫身技能、不死身、天生神力同無限體能，到最後梗係一人救全家啦。仲以為呢類戲只會喺我國出現，原來荷李活都有，真係有眼不識泰山。
90分鐘之後嘅結論係，都係唔好太過相信觀看排行榜。
