霸戲哥之日常#260｜ 女戰神

常言十套Netflix九套伏，霸戲哥就係死唔信邪，反正哥有的是時間。

近日有齣由雷神Chris Hemsworth老婆Elsa Pataky孭飛嘅電影《終極攔截戰》（Interceptor）上架，雖然外國評論一面倒負評，但喺Netflix觀看排行榜一直高鋸前十（仲試過榜首），我諗點差有個譜啩。

故事講恐怖分子精心策劃咗六年，同俄羅斯嘅叛亂分子合作（又係俄羅斯），偷咗16枚核彈，準備射向美國16座城市，當然有華盛頓份啦。美國有兩個導彈攔截基地，一個已經被攻陷，另一個呢就由Elsa死守。

一套關乎全美國，甚至係全球安全嘅戲，斷估都會牽涉好多國家或組織介入，點睇都似大片格局。殊不知套戲唔知係咪唔夠budget，出現嘅大型場景只得兩個：一個當然係攔截基地啦，而另一個就係呢類電影必然出現嘅指揮中心，但班總統參謀軍官除咗阿支阿左之外，係乜都幫唔到手。

簡單鋪排咗背景，接住落嚟就係無腦可言嘅Elsa個人表演，包括脫身技能、不死身、天生神力同無限體能，到最後梗係一人救全家啦。仲以為呢類戲只會喺我國出現，原來荷李活都有，真係有眼不識泰山。

90分鐘之後嘅結論係，都係唔好太過相信觀看排行榜。

霸戲哥

** 博客文章文責自負,不代表本公司立場 **

話說《尋人記II》播出之後，霸戲哥已經先後撞過兩次元朗特首梁安國（都係大埔），同一次N無男孩徐志文（柴灣），證明呢個香港其實幾咁細。

但香港細唔代表尋人易，亦咪以為方東昇真係咁神通廣大，其實每次成功尋人嘅背後，中間夾雜住無數次失敗同嘗試。而今集節目仲要嚟個五星級任務——徐志文主動提出想尋找從未見過面嘅生母。

由一張破爛嘅出世紙開始，到去佢出世嘅醫院打聽，再意外搵到志文媽媽嘅泰國地址，到最終搵紅十字會出手，可惜到呢刻仍然未有消息。

霸戲哥同豬視妹都好關心呢段「尋親記」，但同時間亦好擔心見到兩個可能性：志文生母不在人世； 志文生母唔想認番個仔。喂，乜咁似《阿飛正傳》嘅。

不過又咁講，人生就係不斷嘅尋尋覓覓。有時結果未必係最重要，能夠喺過程入面嚐到甜酸苦辣，先至最珍貴。