博客文章
《為你鍾情》係1985年同名電影嘅主題曲，老實講套戲雖有張國榮、李麗珍同柏安妮主演，但認真乏善可陳，唯獨首歌係百聽不厭，哥哥用佢把柔情似水嘅唱腔唱出「以後同用我的姓」，正常女仔都會「I do， I do」。
後來有唔少人翻唱《為你鍾情》，可惜唱功再好都唱唔出哥哥嘅神髓。霸戲哥又點會估到，今晚睇《聲生不息》聽到女聲版《為你鍾情》，竟然會被感動多一次。奇就奇在，男歌女唱反而又有另一番韻味。
唱出《為你鍾情》係00後嘅女歌手單依純。即上維基睇吓佢來頭，2020年考入浙江音樂學院，主修流行演唱。同年參加浙江衛視節目《2020中國好聲音》奪得總冠軍。嚴格嚟講，佢出道都未夠兩年，就已經有呢個唱功, 真係後生可畏。
睇《聲生不息》，完全feel到長江後浪推前浪。
霸戲哥
** 博客文章文責自負,不代表本公司立場 **
幾日前睇完Elsa Pataky套奇片《終極攔截戰》，唔爭在睇埋佢老公Chris Hemsworth套《蜘蛛頭監獄》，話晒係近期紅爆嘅 《壯志凌雲：獨行俠》個導演Joseph Kosinski拍，呢次衰極有個譜啦。
電影根據短片小說改編，講述蜘蛛頭監獄係一個特殊監獄，犯人可以喺範圍內彈出彈入，放風吹水打機打枱波都冇問題，但就要強制被迫試藥。
坐監都有咁優厚待遇，聽落係咪好荀先？啲新藥係由雷神Chris飾演嘅科學家研發，當中有催情、釀鬱同服從，被落藥嘅犯人個個鬼上身咁不受控制。班犯起初畀催情藥搞到爽YY，後來見識過釀鬱嘅威力，先知白老鼠一啲都唔易做。
套戲嘅setting其實唔錯，有啲《Black Mirror》feel，雷神做瘋狂科學家亦算癲得勻循。美中不足係個story telling技巧好一般，好多情緒起伏位都係蜻蜓點水式帶過，明明套戲可以探討更多關於罪惡感、救贖、自由意志同藥物操控嘅範疇，肯定可以拍得更deep。
另一點亦可以肯定，雷神兩公婆應該cap咗Netflix唔少錢。
