霸戲哥之日常#269｜ 又電視大戰？

呢排聽得最多嘅，唔計珍寶海鮮舫，應該係「電影大戰」。難得TVB、ViuTV同香港開電視喺黃金時段都有劇集推出：TVB繼續用三線劇出陣（《愛‧回家之開心速遞》、《尚食》、《十八年後的終極告白2.0》）；ViuTV有劉心悠同郭羨妮孭飛嘅《冥冥之中》；開電視有林峯、周秀娜嘅合拍劇《黑金風暴》，一時之間好似好緊湊。

只可惜收視數據其實好沉悶，所謂嘅「電視大戰」都只不過係口水戰，無論ViuTV同開電視幾努力，始終擺脫唔到個位數收視嘅命運。霸戲哥始終期待見到三台鼎立嘅局面，因為只有咁樣，各電視台先會精益求精，花更多時間心機同成本去製作好節目， 觀眾自然有更多選擇。呢個先係電視迷之福。

不過，隨住今個星期J2重啟，一堆新節目安排喺黃金時段同TVB對撼，下個禮拜嘅收視表會唔會有新衝擊呢，下星期自有分曉。

霸戲哥

** 博客文章文責自負,不代表本公司立場 **

依家J2有個「呢鋪開乜」系列，每晚開唔同範疇，涉獵一啲較冷門嘅題材，滿足年輕一代嘅好奇心。而霸戲哥比較關注逢禮拜二晚播出、由洪永城、涂毓麟、黃嘉雯主持嘅《開腦》。

近年有個被嚴重濫用嘅詞彙叫「腦洞大開」，《開腦》相信係打開你個腦洞嘅意思，節目講解高科技商機，包括上年曾經好hit嘅元宇宙概念。

霸戲哥覺得呢個節目好蝦人拍，因為大家對元宇宙嘅熱衷程度，就同Bitcoin嘅價格一樣極之浮動。其中最難掌握嘅就係，啲資訊夠唔夠update。

仲記得上年年尾，每次有朋友聚會，傾傾吓話題都會轉移咗去NFT度，個個摸住杯底講到唉聲歎氣，輪流哭訴邊隻NFT賺得最少。今日又點呢？我勸大家提都咪提囉。

霸戲哥最期待嘅係，究竟節目會灌輸一個點樣嘅心態同價值觀，去面對勢將降臨嘅web3.0時代呢？