博客文章
今日係J2重啟大日子，霸戲哥亦正式宣佈J2監察站今日開始運作，由我、豬視妹同大爺雞為大家審視J2嘅新節目。
問豬視妹最先想睇咩，佢諗都冇諗就話《貧窮限制想像》，你睇我哋呢家人幾窮……
以前耐唔耐就有啲所謂體驗窮人生活嘅真人騷，霸戲哥覺得太造作同偽善，何況普羅大眾都係餐搵餐食，仲邊有心情睇你扮窮啫？
《貧窮限制想像》就掉番轉，由奶仔方紹聰做主持，窮L帶觀眾體驗超豪生活，感受下擁有無限金錢嘅無奈同壓力。究竟喺物質無求嘅狀態下，每天生活仲可以點過？
有時諗，唔一定係貧窮限制想像，有錢打破晒所有限制，某程度上更需要想像力。
霸戲哥
** 博客文章文責自負,不代表本公司立場 **
《為你鍾情》係1985年同名電影嘅主題曲，老實講套戲雖有張國榮、李麗珍同柏安妮主演，但認真乏善可陳，唯獨首歌係百聽不厭，哥哥用佢把柔情似水嘅唱腔唱出「以後同用我的姓」，正常女仔都會「I do， I do」。
後來有唔少人翻唱《為你鍾情》，可惜唱功再好都唱唔出哥哥嘅神髓。霸戲哥又點會估到，今晚睇《聲生不息》聽到女聲版《為你鍾情》，竟然會被感動多一次。奇就奇在，男歌女唱反而又有另一番韻味。
唱出《為你鍾情》係00後嘅女歌手單依純。即上維基睇吓佢來頭，2020年考入浙江音樂學院，主修流行演唱。同年參加浙江衛視節目《2020中國好聲音》奪得總冠軍。嚴格嚟講，佢出道都未夠兩年，就已經有呢個唱功, 真係後生可畏。
睇《聲生不息》，完全feel到長江後浪推前浪。
