又係時候分享吓啲小眾嘢。
一年一度嘅「歐洲電影節」（EUFF2022）將於7月15日至7月31日舉行，屆時會放映18部嚟自歐洲嘅作品。點解話係小眾？因為呢類戲通常都冇大卡士，亦唔係主流嘅商業片，唔會有飛天遁地畫面，好多時都係人文小品，即係悶死人嘅戲。
但霸戲哥其實最鍾意睇呢啲。
淨係講開幕同閉幕電影都已經夠吸引。打頭陣嗰齣叫《遺棄之地》（the Forgotten），你估中嘞，係烏克蘭片，內容梗係同烏俄戰爭有關，政治味道濃厚。閉幕嘅係波蘭片《死無對政》（Leave No Traces），因為改編自真實事件，所以霸戲哥想講多少少。
事件發生喺1983年，正值戒嚴時期嘅波蘭。一名高中生Grzegorz Przemyk畀警察打死，波蘭政權用盡方法cover up，結果激起民憤。電影以呢件事為藍本，但將焦點放喺警察、媒體同法律體制點樣同流合污，令真相淹沒。
電影其中一個作用就係借古諷今，呢個亦係霸戲哥咁鍾意電影嘅原因之一。
霸戲哥
** 博客文章文責自負,不代表本公司立場 **