博客文章
每次聽到啲人話有錢就身痕，霸戲哥都會笑而不語，因為人根本冇錢都會身痕。淘寶啱啱喺618搞咗個乜鬼優惠，結果豬視妹又淘咗堆「寶貝」，日日問我「批」貨幾時到。
新冠疫情改變咗大家嘅生活模式，網購變得越來越普及，依家啲人都懶得出街，喺個app度篤兩篤，基本上已經有齊生活所需。問題係，冇得去實體店感受實物，你又點知件貨對唔對辦？
今晚J2將會有「開箱」節目《BlahBlahBlah試新室》，一班J2ers會以身試伏，測試啲網購返嚟嘅古靈精怪玩意。
Well，豬視妹睇完呢個節目，下次會唔會淘得仲多呢？
霸戲哥
** 博客文章文責自負,不代表本公司立場 **
大家實聽過賭仔磨爛席。霸戲哥已經陷入呢個狀態，呢輪睇親Netflix戲都中大伏，情形就同賭仔一樣，連開十口莊都死唔信邪，總有一套見得吓人啩？
連豬視妹都戥霸戲哥唔抵，加入埋搜尋「好片」行列，呢日幫我搵咗套《天怒》（The Wrath of God），阿根廷片嚟，可能喺製作上會畀多少少心機。
故事講述女主角Luciana，多年前控告一位作家Kloster性侵，間接累死Kloster嘅妻女。後來Luciana嘅家人逐個逐個離奇死亡，令佢一直懷疑係Kloster報復，於是搵記者Esteban揭發真相。
用正常邏輯推測，再加上近年吹奏嘅荷李活metoo風潮，令你懷疑係Luciana存心誣蔑Kloster，再編製故仔嚟陷害對方，要對方身敗名裂。橋段就好似早年林嘉欣同張學友套《暗色天堂》咁，嘉欣千方百計要整死學友一樣。
套戲奇就奇在要睇到最後一刻，先至解開謎團。結局係出人意表地冇任何出人意表嘅事，真係平鋪直敍咁講完就算，完全估你唔到，亦唔明白為乜鋪排咁多伏線。呢個算唔算係導演巧妙安排呢，真係見仁見智。
仲有就係，千祈唔好畀個戲名呃到，套戲同宗教完全冇關係嘅。
