霸戲哥之日常#271｜ 天怒人怨

大家實聽過賭仔磨爛席。霸戲哥已經陷入呢個狀態，呢輪睇親Netflix戲都中大伏，情形就同賭仔一樣，連開十口莊都死唔信邪，總有一套見得吓人啩？

連豬視妹都戥霸戲哥唔抵，加入埋搜尋「好片」行列，呢日幫我搵咗套《天怒》（The Wrath of God），阿根廷片嚟，可能喺製作上會畀多少少心機。

故事講述女主角Luciana，多年前控告一位作家Kloster性侵，間接累死Kloster嘅妻女。後來Luciana嘅家人逐個逐個離奇死亡，令佢一直懷疑係Kloster報復，於是搵記者Esteban揭發真相。

用正常邏輯推測，再加上近年吹奏嘅荷李活metoo風潮，令你懷疑係Luciana存心誣蔑Kloster，再編製故仔嚟陷害對方，要對方身敗名裂。橋段就好似早年林嘉欣同張學友套《暗色天堂》咁，嘉欣千方百計要整死學友一樣。

套戲奇就奇在要睇到最後一刻，先至解開謎團。結局係出人意表地冇任何出人意表嘅事，真係平鋪直敍咁講完就算，完全估你唔到，亦唔明白為乜鋪排咁多伏線。呢個算唔算係導演巧妙安排呢，真係見仁見智。

仲有就係，千祈唔好畀個戲名呃到，套戲同宗教完全冇關係嘅。

霸戲哥

** 博客文章文責自負,不代表本公司立場 **

呢期最威係巴斯光年，電影《光年正傳》上星期先上畫，Disney+順勢又loop番啲Toy Story舊戲，就連貌似巴斯光年嘅鄧梓峰，都啱啱有新節目推出。

霸戲哥兜咁大個圈，無非都係想講吓J2個新節目《關注關注組》啫。除咗鄧梓峰，仲有幾位靚女陳欣茵、杜穎珊同王虹茵做主持，內容顧名思義，就係關注facebook入面嘅關注組。TVB今鋪攞正牌上網攞料，慳水慳力得嚟又幾有gimmick噃。

呢啲所謂XX關注組，其實只不過係N年前討論區嘅演化版，特點係耐唔耐就會有素人出post，圍爐討論一番。霸戲哥成日覺得呢啲關注組嘅版主都係打手居多，借頭借路出post引人討論為名，宣傳為實，甚至抹黑潛在競爭對手。

霸戲哥噚晚睇嗰集《關注關注組》講「燒賣關注組」，幾位年輕主持真係有落區試唔同燒賣，驗證吓版主嘅評分嘅可靠度。

話時話，霸戲哥都開咗個「香港影視娛樂關注組」，唔知鄧Sir有冇興趣關注吓呢？