霸戲哥之日常#270｜ J2監察站(3)：關注組

呢期最威係巴斯光年，電影《光年正傳》上星期先上畫，Disney+順勢又loop番啲Toy Story舊戲，就連貌似巴斯光年嘅鄧梓峰，都啱啱有新節目推出。

霸戲哥兜咁大個圈，無非都係想講吓J2個新節目《關注關注組》啫。除咗鄧梓峰，仲有幾位靚女陳欣茵、杜穎珊同王虹茵做主持，內容顧名思義，就係關注facebook入面嘅關注組。TVB今鋪攞正牌上網攞料，慳水慳力得嚟又幾有gimmick噃。

呢啲所謂XX關注組，其實只不過係N年前討論區嘅演化版，特點係耐唔耐就會有素人出post，圍爐討論一番。霸戲哥成日覺得呢啲關注組嘅版主都係打手居多，借頭借路出post引人討論為名，宣傳為實，甚至抹黑潛在競爭對手。

霸戲哥噚晚睇嗰集《關注關注組》講「燒賣關注組」，幾位年輕主持真係有落區試唔同燒賣，驗證吓版主嘅評分嘅可靠度。

話時話，霸戲哥都開咗個「香港影視娛樂關注組」，唔知鄧Sir有冇興趣關注吓呢？

霸戲哥

** 博客文章文責自負,不代表本公司立場 **

呢排聽得最多嘅，唔計珍寶海鮮舫，應該係「電影大戰」。難得TVB、ViuTV同香港開電視喺黃金時段都有劇集推出：TVB繼續用三線劇出陣（《愛‧回家之開心速遞》、《尚食》、《十八年後的終極告白2.0》）；ViuTV有劉心悠同郭羨妮孭飛嘅《冥冥之中》；開電視有林峯、周秀娜嘅合拍劇《黑金風暴》，一時之間好似好緊湊。

只可惜收視數據其實好沉悶，所謂嘅「電視大戰」都只不過係口水戰，無論ViuTV同開電視幾努力，始終擺脫唔到個位數收視嘅命運。霸戲哥始終期待見到三台鼎立嘅局面，因為只有咁樣，各電視台先會精益求精，花更多時間心機同成本去製作好節目， 觀眾自然有更多選擇。呢個先係電視迷之福。

不過，隨住今個星期J2重啟，一堆新節目安排喺黃金時段同TVB對撼，下個禮拜嘅收視表會唔會有新衝擊呢，下星期自有分曉。