霸戲哥之日常#279｜ J2監察站(7)：大埔滘靈探

大埔地靈人傑，但亦都流傳好多猛鬼傳說。其中最聳人聽聞嘅，一定係1955年嘅盂蘭節前夕，喺大埔滘松仔園發生嘅一宗慘劇，其時一班師生同九廣鐵路員工去郊遊，突然遇上山洪暴發，最後28人慘死。另外，嗰度一帶亦係交通黑點（如2018年雙層巴士翻側案，造成19人成亡），故有「猛鬼橋」之稱，成日有傳聞話搵冤魂搵替死鬼。

J2為咗推出新靈異節目《搵鬼陪你瞓》，第一集就搵咗主持陳國麟同麥詩晴嚟「打大佬」，要佢哋去大埔滘瞓一晚不特止，仲即場喺當地「招魂」，試圖訪問靈體解答觀眾嘅疑問。導演一嚟就咁harsh，換轉其他人都未必肯制，陳國麟同麥詩晴兩位J2ers嘅膽色同專業精神，確實幾令人佩服。

大家咪以為靈異節目好易拍，霸戲哥以前都有製作過靈異題材嘅專題，事業準備工夫都已經一大堆，中間又要應付突發事件，拍完嘅善後工作都唔少。記得有次去和合石做專訪，事前已經拜晒土地，結果第二日踢波斷阿基里斯跟腱，都咪話唔邪。

唔係話要導人迷信，但迄今科學亦冇辧法證明鬼神之說係唔存在，如果認定呢個世界冇鬼，其實亦一啲都唔科學。若要求真，霸戲哥認為要先開放自己，又或者從接受收睇靈異節目開始。

霸戲哥

** 博客文章文責自負,不代表本公司立場 **

因為Mr. Bean，霸戲哥居然一口氣煲晒成套Netflix劇。佢套《人蜂不兩立》雖然斬開九集，但當去到每集尾聲時，就算你幾眼瞓，身體都好似唔受控制咁煲埋去，直至意識到第二朝原來要早起時先心知不妙。

能夠深宵戇狗狗睇戇豆而自豪嘅，肯定唔止霸戲哥一個。好似又要湊仔、又要開壇講股嘅唐牛，咪一樣咁無聊。

霸戲哥鍾意咗Mr. Bean大大話話都超過半個世紀，每年聖誕都例行公事要翻睇「Mr. Bean過聖誕」，保守估計至少睇過30次。奇在佢嘅笑料幾十年來千篇一律，無論係《戇豆先生》抑或《特務戇J》，堆砌嘅笑料都不外乎剝光豬、打爛嘢、鹹濕嘢同炒車，但觀眾咁多年嚟都照單全收。

今次呢套《人蜂不兩立》，就係講佢幫人看屋（to be precise係豪宅），因為畀一隻蜜蜂滋騷，搞到燒咗人間屋。其實劇情真係超級無聊，但Mr. Bean就係有呢個魔力，你明知佢會破壞所有嘢先收手，但個心總係想睇吓佢點撞板，然後擺出一個不在乎嘅戇狗狗樣。

Netflix成日畀人話冇好嘢好睇，不如搵Mr. Bean拍多幾齣呢類戲，保證可以留得住我哋呢班無聊觀眾。