霸戲哥之日常#282｜ Swatting

霸戲哥細個曳到癲，玩到冇嘢好玩，就心思思想打三條九整蠱警察叔叔，仲諗定埋後路，話係受軟硬電話整蠱影響先作惡，還望大人不記小人過。

好在霸戲哥當初怕死冇落手，後來先知電話勾線原來咁易，警察要做嘢實trace到源頭。到今日監聽監控嘅年代，報假案肯定死路一條，我以為。

噚日喺Netflix睇咗套紀錄片《玄虛世界：致命網絡謊言》，先知喺號稱全球最安全嘅美國，報假案問題原來極之嚴重，佢哋仲有個專有term叫「Swatting」。大家都知SWAT（Special Weapons and Tactics)係特種部隊，而通常虛報都係有咁大吹咁大，脅持人質呀、恐怖襲擊呀 所以每次都驚動成隊SWAT晒馬，個term就係咁嚟。

紀錄片記載一宗2017發生嘅Swatting悲劇，無業漢Tyler Barriss不嬲有虛報前科，有次收「柯打」吹雞，警方接報到場，結果一名「勇警」開槍射殺無辜屋主。最終Tyler Barriss被判囚20年。

《玄虛世界：致命網絡謊言》總共6集，都係探討新興嘅互聯網罪案，遲啲有機會再同大家介紹。

霸戲哥

** 博客文章文責自負,不代表本公司立場 **

原諒霸戲哥就係咁膚淺，一見到人玩繩縛，第一時間會諗起AV情節，同凝住附近有條皮鞭同蠟燭，心諗個女仔好眉好貌做乜玩到咁刁咁變態。

有呢種世俗眼光，除咗因為衰鹹濕之外，主要係因為狹隘嘅見識令我哋產生偏見。但互聯網嘅普及，見識少已經再唔係藉口，你想知嘅事基本上都Google到。我哋嘅孤陋寡聞。

繩縛，日文「縛り」（shibari），源於日本古代武士用嘅捕繩術，後來歌舞伎加入咗呢個元素，慢慢演變成一種藝術。繩縛藝術有唔同風格，當然都有AV常見嘅BDSM（Bondage, Displine, Sadism & Masochism）；有為攝影而設嘅追求視覺美感；亦有係為宣洩情緒嘅吊綁。

今晚J2播出嘅《喂喂喂 你話你係邊個邊個》，故事主人翁就係繩縛藝術師Rika，佢會分享點解由一名OL，突然決心到日本學藝，再搖身變成繩縛師嘅心路歷程。

或者大家睇完節目，以後唔使再用淫邪眼光去看待繩縛呢門藝術。