霸戲哥呢世人入長洲唔多過三次，都係10歲之前嘅事。點解？一日最衰都係學人買《Yes!》睇，而長洲實在太多精采鬼故事，依家諗番起都驚驚。

除咗燒炭勝地東堤小築，長洲仲流傳咗好多都市傳說，好似長洲警署咁，話以前日軍喺嗰度行刑「斬頭」處決華人；仲有成日有猛鬼傳聞嘅方便醫院；而聽落好有金庸小說feel嘅「紅梅山莊」，更係靈探熱點。

「紅梅山莊」位於長洲東南方嘅山頂上面，係一間荒廢多年嘅破屋，四周圍已經佈滿野草。相傳以前屋主係富貴人家，一家四口生活美滿。但因為一次飛機失事，全家罹難，間屋就荒廢到依家。事實係咪咁不得而知，但好哋哋一間大屋突然冇人打理，確實係匪夷所思。

J2今晚播出嘅《搵鬼陪你瞓》，兩位主持馮子亮同麥詩晴認真慘情，被導演安排要去「紅梅山莊」瞓一晚。結果當然領晒嘢，又要勞煩師傅幫佢哋「淨身」。

霸戲哥覺得最詭異嘅，唔係「紅梅山莊」入面有冇靈體定山精鬼魅，而係點解楝嘢荒廢咁多年都冇人鵲巢鳩占。你哋答我咩鬼最可怕？係窮鬼呀。




霸戲哥

** 博客文章文責自負,不代表本公司立場 **