博客文章
Facebook耐唔耐就會彈出啲動態回顧，喺七一呢個咁歷史性嘅日子，大家當然有唔少難忘回憶。七年前嘅今日，原來我同豬視妹去咗睇《迷你兵團》（Minions），而續集《迷你兵團2》咁橋早兩日先上畫。
我諗人好多人同霸戲哥一樣，分唔清《壞蛋獎門人》同《迷你兵團》，不過唔緊要啦，反正故事永遠都係咁上下，犀利哥永遠都係大贏家，Minions嘅香蕉語永遠都係聽唔明。
Anyway，今集其實係前傳，講述犀利哥同迷你兵團相遇嘅經過，同埋佢點解咁雄心壯志，誓要成為全宇宙最邪惡嘅大壞蛋。不過大家其實都係想睇度班Minions搗蛋，笑吓輕鬆吓咁啫，所以點都係會入場睇。睇完順便去老麥買個開心樂園餐，換埋個Minions玩具就perfect。
唔知《迷你兵團3》會唔會又要等七年先上畫呢？到時仲有冇戲院呢？
霸戲哥
** 博客文章文責自負,不代表本公司立場 **
大家有冇玩過一隻電腦生存遊戲叫《Don’t Starve》？遊戲目標就係要生存，主角一開始要徒手執石劈柴摘果紮營，同時要抵抗大自然嘅災害同猛獸嘅襲擊。玩到無幾耐，主角要開始找尋水源，水作為生命之源，冇食用水基本上係生存唔到。
世事好多嘢都話唔埋，假若有日我哋流落荒山野嶺，究竟點先可以搵到食水？由梁諾妍、施焯日、杜穎珊同馮子亮主持嘅J2節目《意外步出》，今晚呢集就教大家點樣喺危急關頭製水吊命。主持介紹咗三種方法，分別係用襪過濾海水、用鞋帶黐石引水、同埋用尿液蒸漏法。霸戲哥真係估唔到，原來尿液蒸漏法係work，蒸漏出嚟嘅水仲要冇尿壓味。
問題係，如果缺水到連尿都冇得屙，咁又何來有得蒸漏呢？計我話，都係等天降甘霖算啦。好明顯，霸戲哥喺荒島肯定捱唔到三日。
睇完呢集《意外步出》，即刻有衝動上Netflix睇多次野外求生經典——Tom Hanks套《Cast Away》。
