博客文章
大家有冇玩過一隻電腦生存遊戲叫《Don’t Starve》？遊戲目標就係要生存，主角一開始要徒手執石劈柴摘果紮營，同時要抵抗大自然嘅災害同猛獸嘅襲擊。玩到無幾耐，主角要開始找尋水源，水作為生命之源，冇食用水基本上係生存唔到。
世事好多嘢都話唔埋，假若有日我哋流落荒山野嶺，究竟點先可以搵到食水？由梁諾妍、施焯日、杜穎珊同馮子亮主持嘅J2節目《意外步出》，今晚呢集就教大家點樣喺危急關頭製水吊命。主持介紹咗三種方法，分別係用襪過濾海水、用鞋帶黐石引水、同埋用尿液蒸漏法。霸戲哥真係估唔到，原來尿液蒸漏法係work，蒸漏出嚟嘅水仲要冇尿壓味。
問題係，如果缺水到連尿都冇得屙，咁又何來有得蒸漏呢？計我話，都係等天降甘霖算啦。好明顯，霸戲哥喺荒島肯定捱唔到三日。
睇完呢集《意外步出》，即刻有衝動上Netflix睇多次野外求生經典——Tom Hanks套《Cast Away》。
霸戲哥
** 博客文章文責自負,不代表本公司立場 **
曾經有一段時間，霸戲哥好沉迷行山同攝影，仲特登買咗人生第一部無反相機xt-10同長鏡，方便一路行山一路打蝶。
當年究竟有幾狂熱？就係未到周末已經心思思搵掟去，甚至做足功課，睇吓邊段行山徑適合新手如我同豬視妹。只要約齊腳，就算天時暑熱都會成行。當然，我哋揀選嘅行山路線，都係山旮旯為主，每次都有如探索秘境嘅感覺。
近年新冠疫情爆發，港人屈埋屆埋冇掟去，居然選擇報復性行山。後來當城門水塘仲多人過旺角嘅時候，霸戲哥連同部富士相機唯有黯然淡出呢個行山界。
不過，港產片《緣路山旮旯》團隊最近舉辦咗個名為「香港真係好靚」嘅攝影比賽，由黃修平、陳詠燊、麥曦茵等做評審，得獎作品會喺高先電影院展示，仲有機會贏取FUJIFILM同FOTOMAX嘅獎品。睇嚟霸戲哥要重出江湖啦！
套戲由黃浩然執導，睇過《點對點》同《逆向誘拐》嘅讀者都知，黃導深愛香港，新戲借岑珈其同五位女主角蘇麗珊、張紋嘉、梁雍婷、陳漢娜、余香凝發展嘅五段情，去記錄香港最山旮旯嘅地方：包括下白泥、荔枝窩、沙頭角、大澳同長洲嘅面貌，好值得大家入場睇。
霸戲哥依家叉住電先，下個禮拜等好天就會出動。
