「雙辣招」草案投票的詭異變幻講極都未講完。照計壓抑樓價係CY重要政策嚟架，西環當然支持，咁身為西環契仔契女的票，應該冇咩懸念架。
話說前年立法會選舉時，出戰九龍東的謝偉俊同九龍西梁美芬，落到區瓜分咗部份左派的樁腳，當時被對手直指兩人為西環契仔同西環契女。
聞說今次政府中人去游說梁、謝兩人支持「雙辣招」時，諗住佢哋都係直選出來，應該唔會同民意玩對抗架，點知呢….契仔好強硬，傾都冇得傾，無論同佢講咩，佢都喺得一句，支持自由市場，反對干預，擺出個勢就係完全冇得考慮。契女就應咗果兩句：議而不決，決而不行，佢心大心細，思前想後，每次傾完都唔表態。去到最後政府要埋數計票時，都俾唔到答案，總之就係計唔到佢果票，幾乎俾佢玩死。
最後契仔、契女都冇選擇到支持政府，搞到中環、西環都極之無癮。有高人估，既然兩人唔再做契仔契女，下屆選擧都唔好旨意民建聯分票俾佢地咯。
巴士的 Gossip
** 博客文章文責自負,不代表本公司立場 **
一批網民到廣東道「驅蝗行動」反自由行，結果玩到三高官齊齊出動狠批。
先係管旅遊的蘇局長先開火，話佢哋咁做，嚴重損害香港的聲譽，傳媒都未消化完蘇局長火力，轉頭保安局同政制及內地事務局的黎局長同譚局長又企埋出嚟，對事件表示非常關注及遺憾，譚局長仲話小部份人的行為「野蠻、較為不文明舉動」，違背主流價值觀。
三個官員輪流發炮的場面好耐冇見，有人奇怪，部分反自由行的人，間中都表現得激啲架啦，點解今次政府反應咁大。相信今次網民去到內地遊客最多的地方咁樣指罵內地旅客，政府都幾關注，萬一再次挑起咗中港矛盾，有可能星星之火足以燎原。
雖則大部分香港人未必同意咁樣搞啲遊客，但太大量的自由行遊客訪港，確實令港人日常生活受到影響，正如蘇局長話過，等車可能要等耐啲。當大家都理性地去諗，問題可能不大，但只有稍不理性的火苗蔓延，咁就好難處理。政府今次咁高調咁有計劃地企晒出來表態，睇怕都係想將事件消滅於萌芽階段。
