博客文章
世事就係咁難料，霸戲哥一連幾日都討論過《秋天的童話》、《歲月神偷》同《玻璃之城》，點估到今日就傳出羅啟銳先生逝世嘅噩耗。
羅啟銳先生係HKU畢業，當年嘅Kong U仔絕對係精英中嘅精英，唔係去政府做AO，就去晒大公司度做。佢投身品流複雜嘅電影圈， 多少令人覺得有啲格格不入。而佢拍檔張婉婷同樣係知識分子，作品流露出濃厚嘅人文色彩同文藝氣息，喺商業掛帥嘅影壇極為罕見。
霸戲哥當年喺報館工作，一直好想搵「大仙」做訪問，探討吓當年撰寫《玻璃之城》劇本時嘅心境，可惜最終未能成事。《玻璃之城》係1998年作品，當中穿插唔少九七回歸嘅畫面，令人更加緬懷九七前流行嘅精英主義、「we are the best」常掛口邊嘅輝煌盛世。
歲月可以偷走一個人的生命，亦可以粉碎一座玻璃之城。但歲月永遠抹不去羅先生在世的痕跡，他的儒雅風範和俠道精神，長存在秋天的童話。
霸戲哥
** 博客文章文責自負,不代表本公司立場 **
霸戲哥呢世人入長洲唔多過三次，都係10歲之前嘅事。點解？一日最衰都係學人買《Yes!》睇，而長洲實在太多精采鬼故事，依家諗番起都驚驚。
除咗燒炭勝地東堤小築，長洲仲流傳咗好多都市傳說，好似長洲警署咁，話以前日軍喺嗰度行刑「斬頭」處決華人；仲有成日有猛鬼傳聞嘅方便醫院；而聽落好有金庸小說feel嘅「紅梅山莊」，更係靈探熱點。
「紅梅山莊」位於長洲東南方嘅山頂上面，係一間荒廢多年嘅破屋，四周圍已經佈滿野草。相傳以前屋主係富貴人家，一家四口生活美滿。但因為一次飛機失事，全家罹難，間屋就荒廢到依家。事實係咪咁不得而知，但好哋哋一間大屋突然冇人打理，確實係匪夷所思。
J2今晚播出嘅《搵鬼陪你瞓》，兩位主持馮子亮同麥詩晴認真慘情，被導演安排要去「紅梅山莊」瞓一晚。結果當然領晒嘢，又要勞煩師傅幫佢哋「淨身」。
霸戲哥覺得最詭異嘅，唔係「紅梅山莊」入面有冇靈體定山精鬼魅，而係點解楝嘢荒廢咁多年都冇人鵲巢鳩占。你哋答我咩鬼最可怕？係窮鬼呀。
