霸戲哥之日常#295｜ J2監察站(14)：辣到飛天

屋企樓下又開一間譚仔了。真心唔知原來香港人咁鍾意食辣，除咗雲南米線舖，川菜館更開到成行成市，就連茶餐廳都要跟風推出酸菜乜乜餐。港人太習慣吃苦中苦，或者吃得辣中辣，先算係人上人啩。

霸戲哥細個都鍾意食辣，以前仲會喺雪櫃偷辣椒蘿蔔當零食，以前講緊幾蚊罐，依家居然賣到廿幾蚊，食水深到呢。人到中年腸胃唔好，每次食完麻辣火鍋都會「屙辣屎」，所以慢慢遠離辛辣。但有時辣癮起都會忍唔住口，肚屙咪肚屙囉。

今晚J2節目《開火》主題就係「辣到飛天」，廚藝大師楊尚友示範一道「邪惡水煮肉眼」，將1kg肉眼成嚿掟落煲度煮，再放滿丁香、花椒、指天椒、孜然等香料，再倒油落煲煮熱，最後切成細塊上碟，大爺雞睇見都流口水。

辣其實係有指標，1912年美國化學家Wilbur Scoville以辣椒素（Capsaicin）嘅含量制訂咗一個指標，並以自己姓氏命名為「Scoville Scale」，量度單位為Scoville，或SHU（Scoville Heat Unit）。我哋平日食嘅辣椒大概1萬SHU，而全球十大最辣辣椒，如「龍之氣息」（Dragon's Breath）就有248萬SHU，傳聞咬一啖可即時gg。

咁唔係辣到飛天，係辣到升天先啱。

霸戲哥

** 博客文章文責自負,不代表本公司立場 **

唔使等到2046，《男兒當入樽》電影版已確定今年12月3號喺日本上映。至於香港有冇得上映？使唔使走到世界的盡頭先有得睇？暫時未知。

《男兒當入樽》可以話影響霸戲哥一生。雖然籃球之神Michael Jordan先係啟蒙，但令我癡迷咁迫自己變強嘅，一定係呢套漫畫。入面嘅角色無論係主角櫻木、流川、仙道、三井，抑或冇咁起眼嘅宮城、木暮、赤木，甚至乎被設定為「壞人角色」嘅魚住、福田、花形呢啲，都有熱血嘅一面，好容易搵到代入位。

結果成個中五，霸戲哥與籃球同《男兒當入樽》為伴，會考就咁炒晒，升唔返原校。係咪影響咗我一生呢……

到後來出嚟做嘢，有位德高望重又學富五車嘅文壇巨人，居然話未睇過男兒當入樽，我二話不說將成套漫畫送上，佢好似發現新大陸咁如獲至寶。講起又想念呢位老友添。

講番呢套電影版，打籃球畫面係用真人動作，再配合電腦3D技術加工而成，估計都係用motion capture啦，令籃球嘅速度感同對抗性，比較像真咁呈現。寫到呢度，霸戲哥已經感受到籃球場上霹靂啪嘞嘅腳步聲，我嘅熱血返晒嚟！