博客文章
今晚呢集《搵鬼同你瞓》打大佬，由兩女嬌滴滴嘅女主持黃瀅仴同吳洛汶，去東堤小築瞓一晚。講真，霸戲哥覺得呢啲「苦差」，冇理由推畀女仔做嘅，結果兩個女仔領晒嘢，之前都流出過一啲片段，見到黃瀅仴喺度喪叫，導演過份咗噃。始終東堤小築真係猛，遠嘅唔講，就今年3月，已經有兩男燒炭自殺。
中國人最忌諱「凶宅」，東堤小築耐唔耐就有人自殺，大家估吓該區樓價會唔會跌得好甘？霸戲哥用例子嚟答你，上年有個成交個案，業主以173萬元賣出，單位實用面積350平方呎，平均呎價唔使5000元。業主2004年以「沙士價」21萬買入，持貨17年帳面勁賺152萬……
事實證明，乜鬼都係假，喺香港哋，有咩驚得過你窮同冇屋住？所以人哋話越窮越見鬼，我認為仲有下句：鬼都怕你窮。
講明先，霸戲哥唔係鼓勵大家炒樓，物業從來都係買嚟自住，如果變「凶宅」致投資失利，除咗講句「抵死」之外，都冇乜好補充了。
霸戲哥
** 博客文章文責自負,不代表本公司立場 **
終於喺Netflix睇咗號稱「史上最恐佈台灣電影」——《咒》。雖然話根據高雄駭人案改編，但放心，成齣戲係冇玩食屎嘅。
故事分開兩個時間軸穿插敍述：6年前女主角亂闖陳氏宗教禁地後撞邪，導致精神失常；6年後重獲女兒撫養權，但發現女兒撞邪，怪事接連發生。
就咁聽劇情，好似冇乜大不了。但霸戲哥可以話你聽，套戲嚇人嘅地方唔淨止係低手嘅jump scare（雖然都係有），佢搖搖晃晃嘅鏡頭、模糊不清嘅畫面、配上極違和嘅詭異音樂，都有辦法令你勁頭暈同極唔舒服。但講到最恐怖嘅，係導演柯孟融運用催眠術，將邪教訊息植入觀眾腦海，令大家同主角一樣中咒！有冇咁大仇口呀導演⋯⋯
其實齣戲一開頭已不停用文字重覆提示觀眾「請你們跟我念這段咒語」、「請你們看這個畫面」、「用意念同想像改變世界」。然後大家會跟住模仿類似密宗嘅結印，同埋唸出「火佛修一，心薩嘸哞」咒語。
起初仲貪得意，去到中段越諗越唔對路，大腦不自覺被電影操控住。其中有幕最得人驚，成個畫面變全白色，聚焦畫面中央一個「咒」宇，然後定格超過一分鐘。當你想將視線移走，你會發現「咒」字會跟住你走。呢個就係電影語言成功hack入你大腦嘅表現。
霸戲哥平生都係第一次睇戲睇到畀人洗腦，越諗越可怕。
寫到呢刻，八字咒語仍然喺我耳邊徘徊。有冇人可以話我知點解咒？
