霸戲哥之日常#304｜ 火佛修一

終於喺Netflix睇咗號稱「史上最恐佈台灣電影」——《咒》。雖然話根據高雄駭人案改編，但放心，成齣戲係冇玩食屎嘅。

故事分開兩個時間軸穿插敍述：6年前女主角亂闖陳氏宗教禁地後撞邪，導致精神失常；6年後重獲女兒撫養權，但發現女兒撞邪，怪事接連發生。

就咁聽劇情，好似冇乜大不了。但霸戲哥可以話你聽，套戲嚇人嘅地方唔淨止係低手嘅jump scare（雖然都係有），佢搖搖晃晃嘅鏡頭、模糊不清嘅畫面、配上極違和嘅詭異音樂，都有辦法令你勁頭暈同極唔舒服。但講到最恐怖嘅，係導演柯孟融運用催眠術，將邪教訊息植入觀眾腦海，令大家同主角一樣中咒！有冇咁大仇口呀導演⋯⋯

其實齣戲一開頭已不停用文字重覆提示觀眾「請你們跟我念這段咒語」、「請你們看這個畫面」、「用意念同想像改變世界」。然後大家會跟住模仿類似密宗嘅結印，同埋唸出「火佛修一，心薩嘸哞」咒語。

起初仲貪得意，去到中段越諗越唔對路，大腦不自覺被電影操控住。其中有幕最得人驚，成個畫面變全白色，聚焦畫面中央一個「咒」宇，然後定格超過一分鐘。當你想將視線移走，你會發現「咒」字會跟住你走。呢個就係電影語言成功hack入你大腦嘅表現。

霸戲哥平生都係第一次睇戲睇到畀人洗腦，越諗越可怕。

寫到呢刻，八字咒語仍然喺我耳邊徘徊。有冇人可以話我知點解咒？

霸戲哥

** 博客文章文責自負,不代表本公司立場 **

霸戲哥好多求生技能，都係老爸教。最記得6歲去泳池學游水，老爸嘅教法相當另類，就係拖我去成人池度，唔畀我對腳掂池底。人一慌，求生意識就出現，掙扎幾秒後就學識踩水，同日學識埋蛙式。

識得喺泳池游，唔代表跌落大海都冇事。先唔講水流同水溫問題，若然喺海中心突然抽筋，又可以點樣自救？記得老爸就教我浮水，四肢盡量放鬆，再閉目休息，等肌肉慢慢鬆弛。但原來都唔係最佳嘅做法。

今晚播出嘅J2節目《意外步出》，隊長梁諾妍就教大家好多遇溺嘅救援方法，其中亦有教點樣正確應付抽筋狀況，原來真係可以喺水中拉筋嘅。另外，亦有教大家點樣拯救遇溺者，但重點係你要好熟水性，如果唔係拯救者隨時變埋遇溺者。

講到尾，大家都要緊記欺山莫欺水，同埋千祈唔好低估水中遇難嘅風險，因為意外往往就係自視過高之下發生。