博客文章
霸戲哥深信每一個人，無論你家財萬貫，抑或聰敏過人，都會遇到失敗。當然失敗定義可以好廣，有人可能係溝唔到女，有人可能係讀唔成書，亦有人係真真正正down to earth，隨時翻唔到身。
今晚播出嘅J2節目《就算得你一個觀眾》，故事主人翁「烘焙兄弟」就試過去到呢個地步。兩兄弟拍住上打江山，憑住努力賺到第一桶金。後來接手台灣蛋糕品裨做代工，生意越做越大。最風光試過月入過百萬，擁有30名員工。點知遇人不淑，畀生意夥伴出賣，被拖數過百萬，銀行戶口得番個位數，連買煎釀三寶都唔夠錢……
霸戲哥雖然未試過山窮水盡到呢個地步，但都經歷過沉重失敗，差啲一蹶不振，而療傷嘅過程亦好漫長同痛苦，實在難以啟齒。
《就算得你一個觀眾》呢個節目都幾特別，能夠畀一啲有經歷嘅人，透過舞台劇演出，去抒發情緒。唔好睇少呢個情緒窗口，有時宣洩完出嚟，世界從此不一樣。
霸戲哥
** 博客文章文責自負,不代表本公司立場 **
呢個世界已經再冇任何嘢可以阻止Sam哥繼續拍《極鬪》。就算新冠疫情令全世界停擺，Sam哥都冇停過來，繼《極闘10 TV屍》上年上映完，《極鬪11零下八度》已經開始動工，最近更發佈海報同「首輪」預告片。
唔經唔覺，認識Sam哥梁成致都接近8年。當時上司有遠見，想我做啲另類人訪，而Sam哥當時自資拍咗幾套低成本cult片《殺屍‧喪變》、《TV屍》同《屍小姐Z》，甩頭甩骨得嚟又好有個人風格，霸戲哥實在好奇Sam哥點會有燒錢念頭，二話不說約訪問。
初次接觸Sam哥，已被對方氣場壓倒，人到中年嘅佢完全冇半分蒼老疲態，叫佢打兩嘢沙包，Sam哥一口氣連打五分鐘仍氣定神閒，以前肯定「食過夜粥」。Sam哥咁打得，點估到份人斯文到你驚，完全同佢個人設極度違和。傾開先知，Sam哥係超級戲癡，因為極度崇拜George Romero嘅喪屍片，所以有機會都想圓夢。
就係呢個小小心願，Sam哥嘅《極鬪》拍完一部又一部，而且每部都有顯著進步，雖則同專業仲有段距離。但人哋講緊係千萬製作，Sam哥嘅戲好難同正規電影比較。
戲名《極鬪》，意思就係喺人生路途上，不停挑戰自己。霸戲哥深信Sam哥呢團火係永遠都唔會熄滅。
期待《極鬪11零下八度》有新突破，預告片我見到出動埋航拍啦。
