霸戲哥之日常#308｜ 藍色大門

陳柏霖主持嘅《極島森林》嚟到最終章，壓軸嘉賓其實都唔使點估，因為世上冇人比桂綸鎂更有代表性。再次喺電視見到佢哋同格出現，一股難以言喻嘅莫名感動湧起，腦海同時奏出陳綺貞首《小步舞曲》⋯⋯

係逝去嘅青春呀！

20年前，陳柏霖喺西門町畀易智言導演睇中拍《藍色大門》，同初出道嘅桂綸鎂結緣，自此成為心靈相通嘅好拍檔。霸戲哥亦因為《藍色大門》，消除咗「台灣電影等於沉悶」嘅偏見，慢慢亦愛上咗台灣呢個純樸而人情味豐富嘅地方。

有別以往幾集《極島森林》，睇得出陳柏霖有桂綸鎂喺身邊，係輕鬆自在好多，或者呢啲就係佢哋所講嘅「唔需要默契嘅默契」。淨係睇佢兩個紮營同煮桶子雞，已經好有娛樂性，桂綸鎂事事親力親為，反而令平日照顧開嘉賓嘅陳柏霖變返個大細路咁。

陳柏霖同桂綸鎂咁friend，但原來呢次係佢哋第一次一齊旅行。或者因為咁，佢哋更加珍惜呢個trip。

唔知三年五年以後，甚至更久更久以後，佢哋又會變成點呢？

霸戲哥

** 博客文章文責自負,不代表本公司立場 **

霸戲哥成日諗，唱歌好唔好聽，係冇絕對客觀嘅標準。當然，學過唱歌同唔識唱歌係有明顯分別，但你話去到專業水平，又或者歌唱比賽個個咁高咁大，唱得好唔好聽好取決於評判嘅主觀感受。

所以，霸戲哥、豬視妹同大爺雞無聊起上嚟，都會匿埋做《聲夢傳奇2》評判，測試下自己嘅眼光同聽力。（大爺雞以搖尾嘅頻率去評分）

睇勻《聲夢2》一班學員，霸戲哥同豬視妹不約而同喜歡毫不起眼嘅Maggie趙頌宜。大家有冇聽過「猜垃圾」？細個踢波分隊，兩隊長包剪揼揀人，揀到最尾冇人要者，為之「猜垃圾」。Maggie就係屬於呢類，第一輪冇導師揀佢，最尾先掹車邊畀林二汶揀中。

Maggie冇美麗外表，表情僵硬無厘笑容，惟獨把聲夠獨特，沉厚得嚟又磁聲，絕對係得天獨厚。噚晚佢一開聲唱《我的心裡只有你沒有他》，已經震撼全場。最重要嘅係，Maggie擁有真性情，唔會矯情造作扮可愛，始終歌唱比賽鬥嘅係歌藝嘛。

希望Maggie可以越戰越勇，同埋要keep住真我個性呀。