霸戲哥之日常#311｜ 剝削

任何當員工係狗嘅公司，就算係行內嘅龍頭，都注定會失敗。但歷史只會不斷重演，當你見到一間間大企業，因為刻薄同剝削低下層員工而走向滅亡，除咗食花生之外，其實都冇乜嘢值得可惜。

霸戲哥原以為剝削員工嘅公司，只會發生喺第三世界國家，點會估到堂堂一間大公司如Marvel Studios，都一樣可以咁刻薄。

話說最近喺鬼佬論壇Reddit，有視覺特效師爆料，呻喺Marvel Studios工作時遇到嘅刻薄待遇，最常見當然係改完又改，又不停OT，搞到連食飯都冇時間，工作壓力極大。加上MCU進入Phase Four之後，瘋狂推出作品，搞到視覺特效師做到冇停手，做出嚟嘅成品質素亦唔達標。呢種惡性循環只會令MCU水平越來越低，遲早畀觀眾離棄。

霸戲哥相信從事設計或創意行業嘅人都知，從來只有「慢工出細貨」，而唔會有「廉價勞工」。如果MCU想繼續維持現有產量掠水，就只有聘請多啲員工分擔工作，或者提供更好嘅待遇。

霸戲哥

** 博客文章文責自負,不代表本公司立場 **

完全低估咗第三針復必泰嘅威力，連續攤屍幾個鐘仍覺天旋地轉，清醒時原來已經夠鐘睇奶仔嘅《貧窮限制想像》。今集佢帶觀眾參觀劉偉強個超豪電影工作室。

霸戲哥早幾年因工作關係，不時到訪電影導演嘅工作室，有時係拍嘢，有時做吓訪問咁啦，杜琪峰嗰個都去過，但嗰次就撞唔到順豐步兵（笑）。咁多過電影工作室之中，劉偉強嗰個真係最有印象，除咗擺放林林總總嘅電影道具，最記得有張舊式戲院鐵凳，三個座位係連埋一齊，同埋唔知咪生鐵造，重到癲嘅。霸戲哥相信係六十年代，甚至更遠古時代嘅產物。

劉偉強出名極之好客，當日佢仲親自下廚煮幾道小菜畀大家食，又分享咗唔少做人道理同拍戲趣事。講緊都五、六年前嘅事了。

呢幾年劉偉強喺大陸密密執，所以見佢工作室又「豪華」咗唔少，相信佢個私人影院肯定又Upgrade過啦。可惜嘅係，霸戲哥應該冇得借工作再上去搗亂，好懷念入面部街機呀。