博客文章
呢排成日有新聞，話啲L樣撞死貓狗不顧而去，仲聲大夾惡鬧番市民轉頭。究竟一個人要有幾渣，先可以咁泯滅人性？霸戲哥信有輪迴，呢啲L樣唔使審至少要輪幾世地獄道。
人有善惡之分，好彩呢個世界都有善心人，無私為貓狗付出。好似今晚J2節目《就算得你一個觀眾》嘅主角Fanny咁，係一名動物義工，會接收啲初生或被棄養嘅狗狗，將佢哋養育，再等候有好主人家收養。Fanny仲修讀緊寵物治療師課程，希望日後可以利用專業知識，幫助更多動物。霸戲哥成日覺得動物義工係天使，就算明知世道咁醜惡，都抱住一顆真誠嘅心，將最好嘅嘢畀晒無親無故嘅動物。
今晚霸戲哥特登捉埋大爺雞一齊睇，大爺雞真係好有靈性，見佢兩行眼淚，分明嫌我同豬視妹唔合格啦……
霸戲哥
** 博客文章文責自負,不代表本公司立場 **
任何當員工係狗嘅公司，就算係行內嘅龍頭，都注定會失敗。但歷史只會不斷重演，當你見到一間間大企業，因為刻薄同剝削低下層員工而走向滅亡，除咗食花生之外，其實都冇乜嘢值得可惜。
霸戲哥原以為剝削員工嘅公司，只會發生喺第三世界國家，點會估到堂堂一間大公司如Marvel Studios，都一樣可以咁刻薄。
話說最近喺鬼佬論壇Reddit，有視覺特效師爆料，呻喺Marvel Studios工作時遇到嘅刻薄待遇，最常見當然係改完又改，又不停OT，搞到連食飯都冇時間，工作壓力極大。加上MCU進入Phase Four之後，瘋狂推出作品，搞到視覺特效師做到冇停手，做出嚟嘅成品質素亦唔達標。呢種惡性循環只會令MCU水平越來越低，遲早畀觀眾離棄。
霸戲哥相信從事設計或創意行業嘅人都知，從來只有「慢工出細貨」，而唔會有「廉價勞工」。如果MCU想繼續維持現有產量掠水，就只有聘請多啲員工分擔工作，或者提供更好嘅待遇。
