博客文章
最近留意到一則爆笑新聞。話說明光社去信無綫高層，批評梁思浩個節目《通靈之王》導人迷信同教壞細路，妄顧社會責任云云。
最抵死係劈頭第一句就邏輯不通—「請為通靈及迷信風氣祈禱」。
堂堂一個宗教團體，叫人唔好導人迷信，情形就好似一啲極權國家，同百姓講倡行自由民主制度一樣。你叫每月捐錢畀你哋嘅信眾情何以堪？
霸戲哥認為本身「導人迷信」呢句說話都好有問題。所謂「迷信」，係指你過份相信一樣冇科學根據嘅事物，譬如豬視妹執迷地相信會中六合彩，呢啲就叫迷信。要留意係冇「科學根據」嘅事物，以今日嘅科學，係無法證實到靈體係唔存在，亦解釋唔到點解慧慧可以感受到梁思浩內心，景峰可以推測到地毯底寫咗個「7」字。如果絕對否定通靈之說，某程度上係冇科學根據，亦即係另一方向嘅「迷信」表現。
如果要保持絕對客觀，我認為更加要放開心胸，事事保持開放態度，自行分析同判斷節目嘅可信性，而唔係偏執地認定入面內容就係導人迷信。
就正如霸戲哥都冇公開叫人唔好信明光社一樣。
霸戲哥
** 博客文章文責自負,不代表本公司立場 **
香港電影界有三大都市傳說：《明日戰記》、《風林火山》同《風再起時》，個感覺就好似爭啲爭啲，拍極都拍唔完。最快跑出有映期嘅，原來係古天樂套科幻巨製《明日戰記》，已定喺8月25日上映。
呢套籌備咗5年、耗資4.5億嘅大片，宣傳攻勢梗唔會同你慳。除咗預告片，喺銅鑼灣時代廣場隔離嘅勿地臣街，整咗塊3D巨型電視外牆，不停播放宣傳影片。影片中係主要機械人角色「窮奇」，就咁睇隻嘢有少少異型feel，看似不受控制咁破籠而出，像真度都幾高。
講起「窮奇」，唔知同中國四大凶獸嘅「窮奇」有冇關連呢。根據《山海經·海外北經》描述，窮奇係天神、怪獸、惡人三位一體，知人言語，擅長蠱惑人心，愛搞風搞雨，挑起戰爭。《明日戰記》呢隻係軍事機械人，原本係保護市民，但後來變成古天樂同劉青雲嘅敵人。聽落兩者又有啲似噃。
香港極少拍科幻片，點解？因為冇投資者肯蝕錢拍囉。但如果因為怕蝕就唔拍，科技只會停滯不前，電影水平不斷落後。霸戲哥估計《明日戰記》都係蝕住做，所以無論套戲最終拍成點，或者爛片都好，都會義無反顧買飛支持，一句講晒盲撐到底。我甚至認為政府應該包場支持一下，谷大個票房，等其他亞洲地區都感受到個票房效應，咁對日後香港電影都肯定有幫助。
