霸戲哥之日常#314｜ 明撐戰記

香港電影界有三大都市傳說：《明日戰記》、《風林火山》同《風再起時》，個感覺就好似爭啲爭啲，拍極都拍唔完。最快跑出有映期嘅，原來係古天樂套科幻巨製《明日戰記》，已定喺8月25日上映。

呢套籌備咗5年、耗資4.5億嘅大片，宣傳攻勢梗唔會同你慳。除咗預告片，喺銅鑼灣時代廣場隔離嘅勿地臣街，整咗塊3D巨型電視外牆，不停播放宣傳影片。影片中係主要機械人角色「窮奇」，就咁睇隻嘢有少少異型feel，看似不受控制咁破籠而出，像真度都幾高。

講起「窮奇」，唔知同中國四大凶獸嘅「窮奇」有冇關連呢。根據《山海經·海外北經》描述，窮奇係天神、怪獸、惡人三位一體，知人言語，擅長蠱惑人心，愛搞風搞雨，挑起戰爭。《明日戰記》呢隻係軍事機械人，原本係保護市民，但後來變成古天樂同劉青雲嘅敵人。聽落兩者又有啲似噃。

香港極少拍科幻片，點解？因為冇投資者肯蝕錢拍囉。但如果因為怕蝕就唔拍，科技只會停滯不前，電影水平不斷落後。霸戲哥估計《明日戰記》都係蝕住做，所以無論套戲最終拍成點，或者爛片都好，都會義無反顧買飛支持，一句講晒盲撐到底。我甚至認為政府應該包場支持一下，谷大個票房，等其他亞洲地區都感受到個票房效應，咁對日後香港電影都肯定有幫助。

霸戲哥

** 博客文章文責自負,不代表本公司立場 **

早年盛傳Netflix科水拍碧咸紀錄片，一直都只聞樓梯響，到年初Netflix宣佈cut budget，仲以為呢類催谷股價嘅project梗會不了了之。點知咸爺前日喺社交平台證實消息，仲會由金像導演Fisher Stevens同John Battsek製作。以近年Netflix製作紀錄片嘅質素，相信唔會太難睇。

英國人特別關注碧咸，佢應該係皇室以外，最受觸目嘅家庭，一舉一動都畀傳媒監察，完全冇晒私隱。霸戲哥當年做報館，啲外娛同事最鍾意咸爺，事關每當冇嘢落鑊，佢哋就老實不客氣咁隊單咸爺新聞出嚟交差，反正無論係沙灘嬉水，拉筋整親腰，抑或一支公買底褲，都一樣有讀者捧場。你話以前啲同事幾鬼懶⋯⋯

霸戲哥欣賞咸爺，就只限喺球場內嘅佢，佢嘅「七旋斬」同近乎屈機嘅罰球，睇咗咁耐波，到呢一刻都冇人能及佢皮毛。咸爺最被人忽視嘅，係佢全場奔走嘅能力，只係大家將注意力放晒去佢啲長傳度啫。

暫時未知紀錄片會有啲乜，但斷估佢嘅足球生涯、點樣將Victoria追到手，同費爵爺嘅恩怨都應該會覆蓋，至於佢同Rebecca Loos嘅一段黑歷史呢，霸戲哥估係唔會有嘅。

點都好啦，大家咁鍾意咸爺，呢套紀錄片係必定要睇嘅。