早年盛傳Netflix科水拍碧咸紀錄片，一直都只聞樓梯響，到年初Netflix宣佈cut budget，仲以為呢類催谷股價嘅project梗會不了了之。點知咸爺前日喺社交平台證實消息，仲會由金像導演Fisher Stevens同John Battsek製作。以近年Netflix製作紀錄片嘅質素，相信唔會太難睇。
英國人特別關注碧咸，佢應該係皇室以外，最受觸目嘅家庭，一舉一動都畀傳媒監察，完全冇晒私隱。霸戲哥當年做報館，啲外娛同事最鍾意咸爺，事關每當冇嘢落鑊，佢哋就老實不客氣咁隊單咸爺新聞出嚟交差，反正無論係沙灘嬉水，拉筋整親腰，抑或一支公買底褲，都一樣有讀者捧場。你話以前啲同事幾鬼懶⋯⋯
霸戲哥欣賞咸爺，就只限喺球場內嘅佢，佢嘅「七旋斬」同近乎屈機嘅罰球，睇咗咁耐波，到呢一刻都冇人能及佢皮毛。咸爺最被人忽視嘅，係佢全場奔走嘅能力，只係大家將注意力放晒去佢啲長傳度啫。
暫時未知紀錄片會有啲乜，但斷估佢嘅足球生涯、點樣將Victoria追到手，同費爵爺嘅恩怨都應該會覆蓋，至於佢同Rebecca Loos嘅一段黑歷史呢，霸戲哥估係唔會有嘅。
點都好啦，大家咁鍾意咸爺，呢套紀錄片係必定要睇嘅。
霸戲哥
** 博客文章文責自負,不代表本公司立場 **