博客文章
蛋撻食酥皮定牛油皮呢個問題，已經引發過無數次世界大戰，有次霸戲哥買錯咗牛油皮畀豬視妹，差啲要罰跪玻璃，正是買錯事小，唔上心事大。至於霸戲哥呢，有時隊到埋口都唔識分酥皮定牛油皮，總之有得食就得啦。
但，蛋撻應該就係最原始用蛋漿整嘅蛋撻，後來演變嘅好似咩薑汁蛋撻、蛋白蛋撻、燕窩蛋撻，甚至乎榴槤蛋撻呢啲，霸戲哥真係掂都唔會掂。
所以當得知今晚J2節目《開火》，楊尚友教整「麵豉豉油焦糖麥精朱古力蛋撻」，霸戲哥一聽都已經擰晒頭。一來唔like麥精朱古力嘅餅底，二來麵豉加日本醬油味道鹹鹹哋，得唔得架？起初仲以為Christian惡作劇，點知原來嚟真，整完出嚟色澤同賣相又可以噃，見到班主持食到舔舔脷，真係唔到你唔服。
霸戲哥最懷念嘅蛋撻，係細個喺茶樓食嘅蛋撻仔，一碟三隻，一啖一個，大滿足。亦因為一碟得三隻，一家四口唔夠分，所以每次都係霸戲爸讓畀我呢啲化骨龍食。呢種人情味喺邊度搵？
霸戲哥
** 博客文章文責自負,不代表本公司立場 **
今時今日已經冇乜人講煲劇，依家原來係叫「捱劇」。唔知幾時開始，大家以捱完一套劇為目標，呢種又要睇又要虎嘅精神自虐狀態，實在令人匪夷所思。
串流平台嘅競爭，造成劇集氾濫固然係主因，觀眾要求越嚟越高亦係不爭事實。而最新一齣「以捱為樂」嘅劇，就係Netflix嘅《生化危機》。
Netflix都老實不客氣，劇集版《生化危機》擺明車馬販賣老餅嘅集體回憶之同時，又試下開拓年輕fans市場。但套劇除咗戲名、入面嘅喪屍呀、t-virus之外，同電玩遊戲、甚至乎Milla Jovovich主演嘅電影版係冇任何直接聯繫。故事圍繞Wesker一家說起，並分成兩條時間線，一條係2022年，女主角Jade同妹妹Billie初初搬到New Raccoon City，發現養父Albert Wesker間Umbrella公司秘密進行實驗。另一條係2036年，t-virus已經爆發，人類死剩1500萬人，牆外就有60億喪屍。霸戲哥暫時睇到第二集，雖未算話好睇，但都未去到過「捱」字吖。
講起Capcom呢隻game，最初喺日本叫Biohazard，但隻game移籍去歐美時，因為同Biohazard樂隊撞名，最後因版權關係先改名做Resident Evil。霸戲哥記得第一次玩《Resident Evil》，係三更半夜偷偷出廳玩，因為黑媽媽關係，令隻game更加恐怖，每吓開門凝住有喪屍撲出嚟。而最後其實係霸戲爸媽出嚟「冚檔」。眨吓眼就二十幾年……
