博客文章
台灣影視呢期威威，除咗柯孟融套《咒》登上Netflix全球排名top 10，近日又爆出一套台劇《媽，別鬧了》，由金馬影后賈靜雯、金鐘視后柯桂嬿主演，但人氣最勁應該係飾演阿媽嘅比莉姐。
《媽，別鬧了》改編自網絡小說《我媽的異國婚姻》，講述陳家母女三人（比莉、賈靜雯、柯桂嬿）失去家庭精神支柱陳爸後，走唔出悲傷嘅漩渦，各自有感情煩惱：細女柯桂嬿鍾情渣男，享受性多於愛；大女賈靜雯經歷愛情失敗後封閉自己，履行單身主義；阿媽比莉最爆，一直視婚姻為人生目標，仲學人網上識男仔。簡單講，三個case都可納入《不正常愛情研究所》嘅討論topic。
近年台劇開始走向新風貌，唔再玩以往嘅偶像劇模式，而嘗試用誇張同爆笑嘅元素，去關注社會現象同風氣，效果都唔錯。呢方面，香港又可以學吓人哋噃。
霸戲哥
** 博客文章文責自負,不代表本公司立場 **
豬視妹睇預告都睇到依嘩鬼叫，今晚呢集《搵鬼同你瞓》都冇乜理由唔睇。又即管睇吓節目入面有冇「導人迷信」元素畀明光社借題發揮。
上集喺東堤小築領晒嘢嘅黃瀅仴，今次夥陳國麟挑戰另一個猛鬼之地——皇后山舊軍營。兩人要摸黑喺荒廢嘅軍營入面「搵雞蛋」（聲稱有靈體依附入面），再將啲蛋運去附近嘅印度廟超渡。正常人黑媽媽探險，最驚未必係靈異嘢，而係實實在在嘅蛇蟲鼠蟻。
皇后山舊軍營位於粉嶺軍地附近，前身為駐港英軍軍營用地，主要由尼泊爾兵駐守，亦即係「啹喀兵」（Gurkhas）。而附近嗰座印度廟，就係為啹喀兵而設，佢係全港唯一一座蓮花形建築，入面供奉嘅係印度破壞之神「濕婆」（Shiva）。雖然被評為三級歷史建築，但為咗配合身後新起嘅新公屋皇后山邨，相信佢都難逃被「破壞」嘅命運。
霸戲哥行山去流水響就多，但真係冇去過呢個軍營。喺節目所見，最詭異應該係點解有咁多格廁所。至於入面猛唔猛？坊間流傳好多都市傳說，都唔排除係地盤工人吹出嚟，據講個荒廢軍營一度畀班地盤工人非法霸佔，仲駁埋水電添！話唔定作幾個故仔出嚟，等外人咪干擾佢哋作息呢。
