霸戲哥之日常#316｜ J2監察站(19)：啹喀軍營

豬視妹睇預告都睇到依嘩鬼叫，今晚呢集《搵鬼同你瞓》都冇乜理由唔睇。又即管睇吓節目入面有冇「導人迷信」元素畀明光社借題發揮。

上集喺東堤小築領晒嘢嘅黃瀅仴，今次夥陳國麟挑戰另一個猛鬼之地——皇后山舊軍營。兩人要摸黑喺荒廢嘅軍營入面「搵雞蛋」（聲稱有靈體依附入面），再將啲蛋運去附近嘅印度廟超渡。正常人黑媽媽探險，最驚未必係靈異嘢，而係實實在在嘅蛇蟲鼠蟻。

皇后山舊軍營位於粉嶺軍地附近，前身為駐港英軍軍營用地，主要由尼泊爾兵駐守，亦即係「啹喀兵」（Gurkhas）。而附近嗰座印度廟，就係為啹喀兵而設，佢係全港唯一一座蓮花形建築，入面供奉嘅係印度破壞之神「濕婆」（Shiva）。雖然被評為三級歷史建築，但為咗配合身後新起嘅新公屋皇后山邨，相信佢都難逃被「破壞」嘅命運。

霸戲哥行山去流水響就多，但真係冇去過呢個軍營。喺節目所見，最詭異應該係點解有咁多格廁所。至於入面猛唔猛？坊間流傳好多都市傳說，都唔排除係地盤工人吹出嚟，據講個荒廢軍營一度畀班地盤工人非法霸佔，仲駁埋水電添！話唔定作幾個故仔出嚟，等外人咪干擾佢哋作息呢。

霸戲哥

** 博客文章文責自負,不代表本公司立場 **

最近留意到一則爆笑新聞。話說明光社去信無綫高層，批評梁思浩個節目《通靈之王》導人迷信同教壞細路，妄顧社會責任云云。
最抵死係劈頭第一句就邏輯不通—「請為通靈及迷信風氣祈禱」。
堂堂一個宗教團體，叫人唔好導人迷信，情形就好似一啲極權國家，同百姓講倡行自由民主制度一樣。你叫每月捐錢畀你哋嘅信眾情何以堪？
霸戲哥認為本身「導人迷信」呢句說話都好有問題。所謂「迷信」，係指你過份相信一樣冇科學根據嘅事物，譬如豬視妹執迷地相信會中六合彩，呢啲就叫迷信。要留意係冇「科學根據」嘅事物，以今日嘅科學，係無法證實到靈體係唔存在，亦解釋唔到點解慧慧可以感受到梁思浩內心，景峰可以推測到地毯底寫咗個「7」字。如果絕對否定通靈之說，某程度上係冇科學根據，亦即係另一方向嘅「迷信」表現。
如果要保持絕對客觀，我認為更加要放開心胸，事事保持開放態度，自行分析同判斷節目嘅可信性，而唔係偏執地認定入面內容就係導人迷信。
就正如霸戲哥都冇公開叫人唔好信明光社一樣。