政事
民政事務局常秘馮程淑儀和其夫馮永業爆發換樓風波，惹來Betty馮是「煲呔曾」愛將的講法，仲話佢兩夫婦結婚由「煲呔曾」證婚，越傳就越遠。
朋友傳來紀惠集團湯文亮的文章，講到「煲呔」點解會推SSD（特別印花稅），湯文亮認為SSD無用，很奇怪煲呔曾為何推出此政策。而家睇完新聞，知道原來曾特首身邊的確有能人，熟悉炒樓運作，「我們從未聽過一個官員話樓價將會大跌，而將自住單位賣走，反而不時發現官員買入物業，我相信曾特首並不知道，直至上星期，他才發現身邊的愛將原來也是炒家，我唔知道他有什麼感想，本來，我替那些相信曾特首出招，樓價必定大跌言論而將自己的自住單位賣走的人不值。」湯生言下之意，係話煲呔曾俾「愛將」老點，搞啲無用的政策去打擊樓市。
不過官場中人就搖頭嘆息，話「牆倒眾人推」，而且傳言每多穿鑿附會，例如話Betty馮兩夫婦結婚由「煲呔曾」證婚，就非事實。實情係煲呔曾要睇報紙，才知兩個人結緍。
另外，煲呔曾和Betty馮共事時間不多，只是在回歸之初，那時政務司司長陳太和財政司司長煲呔共用一個新聞秘書，Betty馮就做這個新聞秘書之位。
Ariel
** 博客文章文責自負,不代表本公司立場 **
香港真係無奇不有，意然有人建議設紅燈區。
立法會一個委員會討論打擊非法賣淫活動，來自會計界的公共專業聯盟梁繼昌提議，香港可效法外國，設立紅燈區，減少色情場所對居民的滋擾和有效規管行業。
梁繼昌又話：「有非法，自然有合法，我本人在西方生活咗好耐，可能啲價值觀同本地市民有些少唔同。要有效規管，打擊有組織賣淫或減少色情場所對普通市民的滋擾，根據我在阿姆斯特丹睇到的，應研究設立紅燈區，呢個才是最治本的。因所有活動都在這個區裡面發生，而且姚思榮議員可能會贊同，呢個對旅遊業有好的刺激。可能有好多人唔贊成，話思維唔使咁先進，但事實上呢件事發生了幾千年，甚至幾萬年都冇停止過，大家面對現實吧！」
政府官員聽到滴曬汗。保安局副局長李家超回應話，如果設立紅燈區，將涉及重大政策改變，要先經過社會廣泛討論，大家都不希望紅燈區在自己附近，認為香港色情問題受控，目前無需要設立紅燈區。
有政壇高人話，開設紅燈區呢類建議，如果由政府官員提出，一定俾人話腦殘，因為呢種咁嘅建議，放到落區議會，冇一個會同意，邊個區議員願意見到，自己個區成街都係性工作者呢？
高人又話，議員成日批評政府，講到好似好容易做咁樣，但係自己又提埋啲「山草藥」建議，嗡得便嗡，唔使負責任。
