霸戲哥之日常#325｜ 鎅木廠

因為鍾楚紅，令更多人得知「志記鎅木廠」嘅存在，可惜呢間超過70年歷史嘅木廠，因為要配合政府嘅發展計劃而被迫清拆，廠入面嘅大量木材、機械同工具，都成為犧牲品。

霸戲哥喺呢度都講過好幾次，自細鍾情木製成品，所以曾經諗過學鬥木。有時又會諗，究竟一件木製傢俬，係點樣由木頭製作出嚟，當中要經過幾多步驟？

咁啱Netflix最近上架有套實境紀錄片《終極伐木達人》（Big Timber）嘅第二季，講述Kevin家族經營嘅私人伐木工廠之日常。原來伐木一啲都唔簡單，不時要面對棘手難題，好似氣候變化、天災風險、機械故障等等，隨時都要作出影響深遠嘅decision making，正是一子錯滿盤皆落索。見到Kevin喺鏡頭前虎來虎去，就知道唔係節目效果，而真係秒秒鐘幾廿萬上落，每落錯決定都會見財化水。

不過假如搵到一碌靚木，回報又相當rewarding，霸戲哥睇嗰集，Kevin團隊有一日時間撈咗十數條雪松原木，咁就賺到3萬美金。

外國嘅小型木廠都咁難生存，可想而知喺香港經營就更加困難。唔知香港有冇人拍低「志記鎅木廠」嘅紀錄片，等後世嘅人了解吓香港鎅木嘅歷史呢？

霸戲哥

** 博客文章文責自負,不代表本公司立場 **

霸戲哥係港島人（東區），荃灣對我嚟講，已經喺惡搞歌《當荃灣愛上柴灣》寫晒，正是「由柴灣返番荃灣終站，我瞓到忘記何站」。但公公以前安葬喺荃灣華人永遠墳場，每年春秋二祭，霸戲哥都要搭死亡地鐵，由港島東縱橫到新界西再折返，認真噩夢。

後來識咗豬視妹，多咗去荃灣食飯睇戲，先慢慢真正認識荃灣，同開始記得一堆商場嘅名字。但到今時今日，仍然冇法理解荃灣嘅城市規劃到底搞乜，點解要整咁多條行人天橋。

今集J2嘅《關注關注組》，咁啱就係討論呢個「天橋之城」。十郎鄧梓峰嘗試解釋荃灣瘋狂起天橋之謎，話如果地面道路太擠塞，起行人天橋嚟疏導交通都無可厚非。不過，霸戲哥就咁睇，就係以前嘅urban planning做得太差，啲工廠起到岩岩巉巉東一忽西一忽，先搞到啲交通咁混亂。其實urban planning係可持續發展（sustainable development）好重要嘅一環，若然一味靠駁天橋嚟解決道路問題，始終都係治標唔治本。

不過咁多條天橋都有度好，就係落雨唔怕濕身啦。