博客文章
TVB近期有齣劇集，唔算好多宣傳，演員也不是甚麼大卡士，靜靜地上咗兩個星期，但口碑越來越好。若不是名字叫《回歸》，令好多人「落閘」，相信收視應該可以更高。
《回歸》係TVB嘅強項——商戰劇，劇情圍繞郭晉安同前妻陳煒經營嘅中菜館「粵德居」發展，當中穿插唔少香港回歸25年經歷過嘅大事件，包括金融風暴、沙士、金融海嘯等，算係融合到亦唔突兀， 劇情到呢刻亦未見大暴走。
郭晉安、陳煒呢啲老戲骨好戲係應份，霸戲哥最估唔到係後生一輩嘅演員，好似吳偉豪、周嘉洛、陳嘉慧同游嘉欣咁，都一樣有驚喜，佢哋飾演新世代嗰條線，串連得好出色，甚至幫到主線加分。
霸戲哥成日諗，TVB唔使套套劇都「晒冷」，有時用新世代演員配搭吓，一來有新鮮感，二來又可以培育後輩，長遠嚟講點都啱數。
希望嚟緊結局篇，唔好嚟個反高潮而衰收尾啦！
霸戲哥
** 博客文章文責自負,不代表本公司立場 **
霸戲哥係港島人（東區），荃灣對我嚟講，已經喺惡搞歌《當荃灣愛上柴灣》寫晒，正是「由柴灣返番荃灣終站，我瞓到忘記何站」。但公公以前安葬喺荃灣華人永遠墳場，每年春秋二祭，霸戲哥都要搭死亡地鐵，由港島東縱橫到新界西再折返，認真噩夢。
後來識咗豬視妹，多咗去荃灣食飯睇戲，先慢慢真正認識荃灣，同開始記得一堆商場嘅名字。但到今時今日，仍然冇法理解荃灣嘅城市規劃到底搞乜，點解要整咁多條行人天橋。
今集J2嘅《關注關注組》，咁啱就係討論呢個「天橋之城」。十郎鄧梓峰嘗試解釋荃灣瘋狂起天橋之謎，話如果地面道路太擠塞，起行人天橋嚟疏導交通都無可厚非。不過，霸戲哥就咁睇，就係以前嘅urban planning做得太差，啲工廠起到岩岩巉巉東一忽西一忽，先搞到啲交通咁混亂。其實urban planning係可持續發展（sustainable development）好重要嘅一環，若然一味靠駁天橋嚟解決道路問題，始終都係治標唔治本。
不過咁多條天橋都有度好，就係落雨唔怕濕身啦。
