博客文章
自從英超完咗賽季，冇波睇（賭）嘅日子，霸戲哥同豬視妹就好似渡日如年，你睇吓我哋連Netflix啲戲都當寶就知。
好唔容易終於等到社區盾開波！意味住啲咩？咪就係下星期英超開鑼囉。社區盾被喻為「英超前哨戰」，由上季英超冠軍曼城，對上季足總盃冠軍利物浦，陣間凌晨12點上演，TVB 翡翠台有得睇。
雖然社區盾唔係啲咩大盃，但兩支球隊肯定唔會放軟手腳，尤其利物浦對上一次拎社區盾已經係2006年，亦即係高普係未拎過嘅。
今晚焦點當然落喺新簽返嚟嘅前鋒，曼城嘅夏蘭特對拜仁時已開咗齋，反觀利物浦嘅達雲紐尼斯似乎仲未融入到球隊噃。
霸戲哥同豬視妹已經ready晒，就連馬會戶口都入晒彈藥，問你怕未！
霸戲哥
** 博客文章文責自負,不代表本公司立場 **
近年荷李華有唔少才華橫溢嘅導演，好似《La La Land》嘅Damien Chazelle、《Moonlight》嘅Barry Jenkins、《The Lobster》嘅Yorgos Lanthimos，都係獨當一面。但講到講故仔能力最高，霸戲哥心目中只有一位，就係《Get Out》同《US》嘅Jordan Peele。
大家一定見識過《Get Out》嘅威力，扭橋扭到你估唔到結局，最重要係Jordan Peele完全捉摸觀眾心理，用催眠伎倆勾住觀眾嘅好奇心、同理心，最後不經意將隱藏主題灌輸，一棍擊中觀眾要害。
新作《Nope》，香港觀眾雖然要等到8月先有得睇，但淨係睇條trailer，已經搞到人好心急想快啲睇。故事大致講牧場主人意外逝世，兩兄妹接手後遇到重重波折。大佬（Daniel Kaluuya）認定父親的死與天上的雲有關，阿妹（Keke Palmer）就諗到以UFO作招徠吸引遊客到牧場觀光。
你話條trailer剪得好吸引？Nope。
你話係咪好恐怖？Nope。
你話有隱藏主題？Nope。
但人類嘅好奇心，先至係最吸引、最恐怖同最識得隱藏。霸戲哥相信條trailer同套戲本身應該係風馬牛不相及，而呢樣亦係迫使你想快啲入場嘅原因。你睇，Jordan Peele乜都冇做，就已經控制咗我嘅大腦。
夠得人驚未？
