霸戲哥之日常#338｜ Nope

近年荷李華有唔少才華橫溢嘅導演，好似《La La Land》嘅Damien Chazelle、《Moonlight》嘅Barry Jenkins、《The Lobster》嘅Yorgos Lanthimos，都係獨當一面。但講到講故仔能力最高，霸戲哥心目中只有一位，就係《Get Out》同《US》嘅Jordan Peele。

大家一定見識過《Get Out》嘅威力，扭橋扭到你估唔到結局，最重要係Jordan Peele完全捉摸觀眾心理，用催眠伎倆勾住觀眾嘅好奇心、同理心，最後不經意將隱藏主題灌輸，一棍擊中觀眾要害。

新作《Nope》，香港觀眾雖然要等到8月先有得睇，但淨係睇條trailer，已經搞到人好心急想快啲睇。故事大致講牧場主人意外逝世，兩兄妹接手後遇到重重波折。大佬（Daniel Kaluuya）認定父親的死與天上的雲有關，阿妹（Keke Palmer）就諗到以UFO作招徠吸引遊客到牧場觀光。

你話條trailer剪得好吸引？Nope。
你話係咪好恐怖？Nope。
你話有隱藏主題？Nope。

但人類嘅好奇心，先至係最吸引、最恐怖同最識得隱藏。霸戲哥相信條trailer同套戲本身應該係風馬牛不相及，而呢樣亦係迫使你想快啲入場嘅原因。你睇，Jordan Peele乜都冇做，就已經控制咗我嘅大腦。

夠得人驚未？

霸戲哥

** 博客文章文責自負,不代表本公司立場 **

以往嘅TVB劇大結局，多數都係豬視妹霸住要睇，好少係霸戲哥調番轉頭溫馨提示佢。所以商戰劇《回歸》算係近年比較高質嘅TVB劇，監製林志華同編審張世昌有料到。

以往TVB劇去到結局篇，通常劇情都已經呼之欲出，角色要死的死，final boss都揭晒盅。但《回歸》去到今晚最後一集，仍然未知「粵德居」嘅生死，祖哥同娟姐會否老套地大團圓復合，家健家謙兩兄弟又會否攜手幫忙經營粵德居嘅brand building同marketing，兼各自有心儀伴侶喺身邊，都要等今晚揭曉。

咁多角色之中，霸戲哥比較欣賞徐榮飾演嘅馬志圖。又咁講，成齣劇，如果冇呢個咁乞人憎嘅角色，就唔會有咁大嘅張力。但呢啲咁仆街嘅角色，一般演員都唔想演，因為太容易被定型，所以徐榮今次真係抵讚，可以話係一人孭起成套劇。