霸戲哥之日常#343｜ 風起了

第46屆香港國際電影節（HKIFF46）今日開始賣飛，香港電影界三大都市傳說，由霸戲哥偶像郭富城、豬視妹偶像梁朝偉聯手主演嘅史詩式電影《風再起時》，以及古天樂套科幻巨製《明日戰記》獲選為開幕電影，不過門票已經極速售罄，想一睹影帝風采嘅影迷，惟有等優先場或者正場嘞。

至於閉幕電影係比利時大師戴丹兄弟執導嘅《兩小無懼》，電影榮獲今屆康城影展75周年特別大獎，呢次亦係套戲嘅亞洲首映。據悉戴丹兄弟會喺現場透過視像同影迷交流添。

為期17日嘅香港國際電影節仲有好多焦點，今年選映來自67個國家同地區超過200部電影作品，並以實體同網上平台播放，梗有一套啱你心水。

節目詳情請瀏覽網頁www.hkiff.org.hk，亦可在各大城市售票網購買電影門票。霸戲哥依家上網昅吓有咩好戲，得閒再整個film list畀大家。

霸戲哥

** 博客文章文責自負,不代表本公司立場 **

無綫為修哥胡楓先生補祝90歲生日，製作節目《人生90好楓Show》，見到修哥依然sharp醒口齒伶俐且轉數極快，霸戲哥都覺得好窩心。

同豬視妹傾開，先發現原來大家都唔記得咩途徑認識修哥，會唔會係細個睇粵語殘片？記得八十年代，翡翠台朝早時段會重播粵語殘片，霸戲哥返下晝班，朝早煲完教育電視就轉台睇粵語殘片。記憶中，修哥專演後生，窮小子媾富家女被棒打鴛盟最後大團圓嗰啲，但偶爾又會做吓渣男，恃住靚仔作威作福，總之令你恨之入骨。

修哥入行七十年，參演超過四百齣電影，百多齣劇集，古今中外相信唔會有人超越到佢。佢嘅一生就咁貢獻咗畀演藝事業，給予幾代港人歡笑，又提攜無數演藝界後輩，今日見到老中青朋友幾代人輪流賀壽，真正係老懷安慰。

祝福修哥繼續風騷，帶畀港人更多歡笑同娛樂。