博客文章
無綫為修哥胡楓先生補祝90歲生日，製作節目《人生90好楓Show》，見到修哥依然sharp醒口齒伶俐且轉數極快，霸戲哥都覺得好窩心。
同豬視妹傾開，先發現原來大家都唔記得咩途徑認識修哥，會唔會係細個睇粵語殘片？記得八十年代，翡翠台朝早時段會重播粵語殘片，霸戲哥返下晝班，朝早煲完教育電視就轉台睇粵語殘片。記憶中，修哥專演後生，窮小子媾富家女被棒打鴛盟最後大團圓嗰啲，但偶爾又會做吓渣男，恃住靚仔作威作福，總之令你恨之入骨。
修哥入行七十年，參演超過四百齣電影，百多齣劇集，古今中外相信唔會有人超越到佢。佢嘅一生就咁貢獻咗畀演藝事業，給予幾代港人歡笑，又提攜無數演藝界後輩，今日見到老中青朋友幾代人輪流賀壽，真正係老懷安慰。
祝福修哥繼續風騷，帶畀港人更多歡笑同娛樂。
霸戲哥
** 博客文章文責自負,不代表本公司立場 **
霸戲哥對泰拳嘅印象，就只有街頭霸王嘅「睇腳鴨腳紮」（Tiger Uppercut）
同Tony Jaa，大部份認知都係嚟自電影。至於賽制、規例、打法統統冇研究，只知好似用腳多過用手，而招式比一般武術凶狠同毒辣。
原來，泰拳已經有五百幾年歷史，亦被視之為神聖活動。泰國人篤信佛教，開賽前都會有敬神嘅祈禱儀式，選手進場時鼓鳴笛響，又披戰袍又戴聖圈，極之莊嚴。但你又點估到，喺神聖、激情、熱血同榮耀嘅背後，居然係貪婪、醜陋、腐敗同罪惡嘅溫床？
Netflix最近上架有套幾過癮嘅劇集《痛心疾首泰拳真面目》，佢用偽紀錄片方式，講解成個泰國拳擊比賽嘅運作，同揭示種種陰暗面，好似賭博、操控拳賽同放貴利數咁。你會發現無論賽判、拳手、教練、評述員、醫療團隊、拳評家、拳賽專家、以至觀眾、賭仔，總之同拳賽掛勾嘅人，統統都有份「養大」呢隻惡魔。不幸捲進漩渦嘅，小則妻離子散，大則斷送性命，都咪話唔害人不淺。
套劇總共四集，每集用不同視角去探討泰拳真面目，個人認為好值得一睇。
