博客文章
《玻璃之城》編劇羅啟銳先生追思會今晚舉行，其生前圈中好友洪金寶、鍾楚紅、杜琪峯、施南生等都有出席，明日上午舉行告別禮。同日傳出不幸消息，《玻璃之城》美術指導余家安先生上月不幸離世。
香港電影從來重幕前輕幕後，但余家安先生係金像獎常客，曾19次獲提名3次奪獎（《笑傲江湖II東方不敗》、《狄仁傑之通天帝國》、《西遊伏妖篇》），名字當然響噹噹。連豬視妹都話，香港嘅美指，除咗張叔平同奚仲文呢啲神級，再數已經輪到余家安。
余家安生前擔任過多齣電影嘅美術指導，好似《東方三俠》、《半生緣》、《特警新人類》、《鍾無艷》、《西遊降魔篇》，另外亦設計過唔少經典造型，最經典要數《英雄本色》入面嘅Mark哥造型。
講到Mark哥造型，又令霸戲哥諗番起以前有個電影頒獎禮，都係借用Mark哥造型做獎項，不過一切已經成為歷史了。
霸戲哥
** 博客文章文責自負,不代表本公司立場 **
世界上最恐怖嘅病，唔係癌症，係失智症（Dementia）。阿茲海默症（Alzheimer's disease）係失智症一種，患者記憶力衰退、性格轉變、認知混亂、到漸漸失去自理能力。一個人冇晒記憶，絕對係最大嘅懲罰。
好多電影都以AD為題材，嚟緊就有套由菅田將暉同原田美枝子主演、川村元氣執導嘅日本電影《百花》，套戲啱啱入選第70屆西班牙聖巴斯蒂安影展（San Sebastian International Film Festival）主競賽單元，亦將會喺影展舉行全球首映。
《百花》講述菅田將暉同原田美枝子飾演嘅兩母子，過去發生過一件無法忘懷嘅事件，導致兩人心存芥蒂。直至菅田將暉有日發現母親有啲唔妥，後被證實患有阿茲海默症，於是決定陪伴母親，慢慢重拾感情。聽落有啲似羅耀輝套《幸運是我》。
《百花》仲有長澤正美參演，遲啲會喺香港上映，到時霸戲哥會再提大家。
