霸戲哥之日常#346｜ 阿茲海默症

世界上最恐怖嘅病，唔係癌症，係失智症（Dementia）。阿茲海默症（Alzheimer's disease）係失智症一種，患者記憶力衰退、性格轉變、認知混亂、到漸漸失去自理能力。一個人冇晒記憶，絕對係最大嘅懲罰。

好多電影都以AD為題材，嚟緊就有套由菅田將暉同原田美枝子主演、川村元氣執導嘅日本電影《百花》，套戲啱啱入選第70屆西班牙聖巴斯蒂安影展（San Sebastian International Film Festival）主競賽單元，亦將會喺影展舉行全球首映。

《百花》講述菅田將暉同原田美枝子飾演嘅兩母子，過去發生過一件無法忘懷嘅事件，導致兩人心存芥蒂。直至菅田將暉有日發現母親有啲唔妥，後被證實患有阿茲海默症，於是決定陪伴母親，慢慢重拾感情。聽落有啲似羅耀輝套《幸運是我》。

《百花》仲有長澤正美參演，遲啲會喺香港上映，到時霸戲哥會再提大家。

霸戲哥

** 博客文章文責自負,不代表本公司立場 **

霸戲哥以前好鍾意聽Ingrid Michaelson首《Keep Breathing》，每遇到生活上嘅困難，都會同自己講，只要仲有一口氣，一切問題都可迎刃而解。

只係，人生係會不停遇到重擊，亦唔係吓吓都避到。有人只要講一句說話，就可以夾生將你整到半死。夠屈機吧？

Netflix最近有齣新劇上架，就係叫《Keep Breathing》。故事講述Melissa Barrera飾演嘅傲慢女律師Liv，遇上空難流落森山。一開始睇，又以為係一般野外求生劇集，啲橋Tom Hanks套《Cast Away》都睇晒啦，但原來野外求生只係佔小部份，Liv透過喺荒島獨處，重整佢混亂不堪嘅人生先係主菜。

雖然外界對套劇評分一般，但霸戲哥幾鍾意佢嘅敍事方式。人生正正就係好似獨處荒島咁，不斷遇到難關，最後就只有自己去面對同承擔。