霸戲哥之日常#351｜ 一味靠吹

如果連通靈都有比賽真人騷，霸戲哥相信只要你想像得到嘅競技，無論係發呆馬拉松，抑或流鼻涕鬥長，都可以拍得成節目。

霸戲哥推介嘅呢個競技真人騷，其實一啲都唔新，當年推出第一季時意外成為Netflix嘅寶藏，佢就係《吹出個未來》，第三季共十集啱啱喺上月底上架。

至於吹What？其實係吹玻璃。十個嚟自不同地域，各懷絕技同身世嘅玻璃師聚首一堂，競逐「最頂尖玻璃師」名銜。比賽考驗參賽者嘅創意、超強忍耐力（抵受高溫）同極限專注力，因為稍一不留神，隨時將藝術品搞垮，功虧一簣。

吹玻璃呢項咁神秘嘅工藝，歷史要追溯返羅馬帝國時期。有別木工、金工、陶藝呢啲工藝，吹玻璃嘅門檻極高，除咗部驟繁複，所用到嘅工具架餐亦非常之多。好似我哋呢類普通人，基本上冇乜可能接觸得到，所以都係睇節目算啦。

不過見到班參賽者，搞一大輪之後展示大成功嘅完成品，都係好治癒嘅。

霸戲哥

** 博客文章文責自負,不代表本公司立場 **

盂蘭節快到，大家未碰到污糟嘢之前，就先畀一堆靈異影視作品包圍。之前喺myTV SUPER大受好評嘅靈異劇《凶宅清潔師》，徇眾要求下，將會喺今個禮禮六夜晚10點半喺J2首播。

套劇叫《凶宅清潔師》，霸戲哥第一時間以為係《救僵清道夫》啲friend，但原來無乜關係嘅。洪永城飾演嘅招仔，18年前因為玩碟仙玩出禍，間接累死老竇老母，為咗報復，決心學捉鬼搵碟仙鬼報仇，慢慢揭開事件真相……好一齣《金宵大廈》x 《18年後的終極告白》（笑）。

現實生活入面，都有唔少人因為玩碟仙而走火入魔，有人因為惶恐而一沉不起，被其他人以為「撞邪」。招仔都一樣，18年嚟一直內疚害死全家，冇辦法過正常生活。點樣先可以走出陰霾擺脫心魔？或者就係套劇想帶出嘅訊息。

最需要清潔嘅，唔係凶宅，係自己嘅心房。