霸戲哥之日常#354｜ Survey Says

多得李思捷個遊戲節目《思家大戰》，搞到豬視妹成日發開口夢喺我耳邊「衰肥四衰肥四」。乜霸戲哥多咗個花名咩？

一個好嘅遊戲節目，唔需要華麗嘅嘉賓陣容，甚至搵素人參加一樣吸引，因為關鍵在於遊戲玩法，同埋掌唔掌握到觀眾追看嘅心理。《思家大戰》就係呢類，玩法極之簡單，觀眾仲可以一齊估答案，亂估都有機會中，啱晒豬視妹。

新一季嘅《思家大戰》，今晚9點半喺翡翠台播出。首集嘉賓有姜大衛率領嘅姜氏一家，對王梓軒率領嘅音樂人隊。《思家大戰》唔係考參賽者知識，反而講求轉數，大家見識過姜麗文呢位「豬隊友」，相信姜氏一家都輸多贏少。

唔信可以訪問100個人，睇下survey點says。

霸戲哥

** 博客文章文責自負,不代表本公司立場 **

新一季英超開鑼啦！首仗凌晨展開，阿仙奴死好命作客贏水晶宮打響頭炮。陣間輪到英倫死敵熱刺登場，夜晚10點主場迎戰修咸頓。

霸戲哥都唔使隱瞞，八十年代已經開始捧熱刺，荷度、華度、阿迪尼斯、基夫阿倫、保羅阿倫粒粒皆星。可惜近年一路同獎盃冇緣，熱迷都畀人恥笑咗好耐。

不過今年機會嚟啦！霸戲哥偶像哈利簡尼狀態顛峰，前線拍住孫興文、古路錫斯基，仲有新加盟嘅李察利臣，同掃蕩型中場比祖馬，上中下三路可謂無懈可擊。仲有主師干地將士用命，帶住班球員個個心服口服，一條心衝冠。

霸戲哥開季前仲買重熱刺捧盃，1賠14，嘿嘿諗起都和味。

陣間一定要旗開得勝，大殺四方！