霸戲哥之日常#353｜ 熱刺登場

新一季英超開鑼啦！首仗凌晨展開，阿仙奴死好命作客贏水晶宮打響頭炮。陣間輪到英倫死敵熱刺登場，夜晚10點主場迎戰修咸頓。

霸戲哥都唔使隱瞞，八十年代已經開始捧熱刺，荷度、華度、阿迪尼斯、基夫阿倫、保羅阿倫粒粒皆星。可惜近年一路同獎盃冇緣，熱迷都畀人恥笑咗好耐。

不過今年機會嚟啦！霸戲哥偶像哈利簡尼狀態顛峰，前線拍住孫興文、古路錫斯基，仲有新加盟嘅李察利臣，同掃蕩型中場比祖馬，上中下三路可謂無懈可擊。仲有主師干地將士用命，帶住班球員個個心服口服，一條心衝冠。

霸戲哥開季前仲買重熱刺捧盃，1賠14，嘿嘿諗起都和味。

陣間一定要旗開得勝，大殺四方！

霸戲哥

** 博客文章文責自負,不代表本公司立場 **

原諒霸戲哥唔熟動漫，竟然唔識《狂賭之淵》呢部作品。噚日豬視妹喺Netflix搵新嘢睇，無意中搵到套《狂賭之淵。雙》動畫嚟睇，一睇就欲罷不能。

故事設定相當有趣，發生喺一座貴族學校，學生唔係學霸就係權貴。學校有嚴格嘅階級制度，地位全靠賭博決定。只要你賭術高招（包括千術），就能支配一切。輸光嘅，就只能乖乖帶上狗帶同狗牌，淪為別人嘅「家畜」。

主角早乙女芽亞里，以特優生入學園，以為憑才智可以殺出血路躋身上流，點知每每身陷泥沼，次次要靠置之死地而後生先翻盤。越睇越似《賭博默示錄》。

呢套動畫最厲害係，佢巧妙將賭博同人生聯繫一齊。賭博學校根本就係社會縮影，到處充斥住爾虞我詐嘅階級鬥爭。上流利用權勢同制度壓榨基層，又將基層標簽，等佢哋可以永續至高無上嘅地位。

入面嘅賭局亦經精心設計，運用唔少高深嘅博奕論，鍾意燒腦嘅讀者實會喜歡。

霸戲哥好欣賞入面嘅金句：既然有71%得勝率你都怕輸，咁就不如唔好賭。同「煙King撳住拎」係異曲同工。

人生不過係一場豪賭，怯？你輸一世。