霸戲哥之日常#352｜ 賭博人生

原諒霸戲哥唔熟動漫，竟然唔識《狂賭之淵》呢部作品。噚日豬視妹喺Netflix搵新嘢睇，無意中搵到套《狂賭之淵。雙》動畫嚟睇，一睇就欲罷不能。

故事設定相當有趣，發生喺一座貴族學校，學生唔係學霸就係權貴。學校有嚴格嘅階級制度，地位全靠賭博決定。只要你賭術高招（包括千術），就能支配一切。輸光嘅，就只能乖乖帶上狗帶同狗牌，淪為別人嘅「家畜」。

主角早乙女芽亞里，以特優生入學園，以為憑才智可以殺出血路躋身上流，點知每每身陷泥沼，次次要靠置之死地而後生先翻盤。越睇越似《賭博默示錄》。

呢套動畫最厲害係，佢巧妙將賭博同人生聯繫一齊。賭博學校根本就係社會縮影，到處充斥住爾虞我詐嘅階級鬥爭。上流利用權勢同制度壓榨基層，又將基層標簽，等佢哋可以永續至高無上嘅地位。

入面嘅賭局亦經精心設計，運用唔少高深嘅博奕論，鍾意燒腦嘅讀者實會喜歡。

霸戲哥好欣賞入面嘅金句：既然有71%得勝率你都怕輸，咁就不如唔好賭。同「煙King撳住拎」係異曲同工。

人生不過係一場豪賭，怯？你輸一世。

霸戲哥

** 博客文章文責自負,不代表本公司立場 **

如果連通靈都有比賽真人騷，霸戲哥相信只要你想像得到嘅競技，無論係發呆馬拉松，抑或流鼻涕鬥長，都可以拍得成節目。

霸戲哥推介嘅呢個競技真人騷，其實一啲都唔新，當年推出第一季時意外成為Netflix嘅寶藏，佢就係《吹出個未來》，第三季共十集啱啱喺上月底上架。

至於吹What？其實係吹玻璃。十個嚟自不同地域，各懷絕技同身世嘅玻璃師聚首一堂，競逐「最頂尖玻璃師」名銜。比賽考驗參賽者嘅創意、超強忍耐力（抵受高溫）同極限專注力，因為稍一不留神，隨時將藝術品搞垮，功虧一簣。

吹玻璃呢項咁神秘嘅工藝，歷史要追溯返羅馬帝國時期。有別木工、金工、陶藝呢啲工藝，吹玻璃嘅門檻極高，除咗部驟繁複，所用到嘅工具架餐亦非常之多。好似我哋呢類普通人，基本上冇乜可能接觸得到，所以都係睇節目算啦。

不過見到班參賽者，搞一大輪之後展示大成功嘅完成品，都係好治癒嘅。