霸戲哥之日常#357｜ J2監察站(23)：龍蝦伊麵

今日收到舊同事嘅囍帖，先醒起原來真係好耐冇去過飲宴，呢個新冠疫情真係搞到港人陀陀擰，擺酒大日子都要一改再改。

咁橋今晚J2節目《開火》主題係婚宴食品，楊尚友教大家煮邪惡嘅龍蝦伊麵。咪住先，霸戲哥見識少，乜婚宴有龍蝦伊麵呢道菜式嘅咩？

講起港式嘅龍蝦伊麵，酒樓食開來來去去都係兩款：上湯龍蝦伊麵，同埋芝士龍蝦伊麵。邊款好食啲？呢個問題，同蛋撻揀酥皮定牛油皮一樣，只會引發世界大戰。不過霸戲哥怕食芝士，所以如果有得話事嗰餐，都係食上湯版。

節目介紹嘅呢道「邪惡龍蝦伊麵」，就係用極重芝士加牛油溝香檳做個芡，隔住個芒都見到好creamy，鍾意食芝士嘅讀者應該舔舔脷，但霸戲哥就麻麻。不過，Christian將隻龍蝦剝晒殼，再一刀刀將啲龍蝦肉切成一小塊，呢個小小舉動當堂加滿分，因為霸戲哥認為食龍蝦最驟忌就係要剝殼。

寫到有啲餓，拿拿聲入廚房淥番個龍蝦杯麵食先。

霸戲哥

** 博客文章文責自負,不代表本公司立場 **

呢個世界有咁多「史上最恐怖鬼片」，究竟邊個地方出產嘅先至最恐佈？日本？歐美？泰國？台灣？抑或土炮呢？

呢個問題就好似「武術之王」同「兵器譜排名」一樣，個個都話自己天下第一，實情根本冇一個標準。

之不過計往績，泰國鬼片係有一定驚嚇力保證，好似《鬼影》、《4條大路通陰間》同《陰容院在》呢啲，諗番起都怯怯哋。

嚟緊Netflix就有齣泰國鬼片《泰恐怖校園怪談》上架，套戲改編自八個恐怖漫畫，都係關於校園嘅故仔，當中不外乎有女學生跳樓呀、圖書館鬧鬼呀、學校canteen賣人肉嗰啲。雖然我哋讀書嗰陣都聽唔少，但因為發生喺我哋唔熟悉嘅泰國，文化背景又唔同，係會多咗份神秘感，大大提升驚嚇度。

霸戲哥承認有少少種族偏見，硬係覺得啲泰仔泰妹「邪邪哋」。有冇人有同感？