霸戲哥之日常#359｜ 阿伯殺神

只要呢個世界仲有罪惡，我哋就會見到里安納遜嘅身影。畢竟已經69歲人，步履不再輕盈，但仍然拖住疲憊身軀，憑住一把槍同無比信念，將邪惡逐一消滅。再唔合理嘅事情，只要發生喺里安納遜身上，觀眾依然照單全收。

里安納遜新片《失憶殺神》聽日上映，佢扮演嘅僱傭殺手，認錢唔認人，但有code of conduct要守，就係唔殺得細路。有次被安排暗殺13歲少女，「孤狼里」安納遜say no後得罪全村人，黑道白道個個想佢死。最慘係里安納遜患有老人癡呆症，好多嘢已經唔記得，更加辨析唔到對與錯。

里安納遜自從拍完《救參96小時》後定咗型，之後幾乎齣齣戲，都係立把槍一人救全家。觀眾已經習慣咗佢嗰種大敵當前嘅冷靜，反正就算幾寡不敵眾，里安納遜最後都係無穿無爛mission accomplished。

但，再鋒利嘅刀都有生鏽嘅一日。觀眾見住個老人家擒高擒低打打殺殺，實在有啲唔忍心。亦因為咁，《失憶殺神》喺爛蕃茄嘅評分都唔太新鮮。惟有寄望戲入面里安納遜有多啲文戲，少啲動作場面，等觀眾睇得冇咁難堪啦。

霸戲哥

** 博客文章文責自負,不代表本公司立場 **

蓮香樓結業，又一間百年老店抵受唔住疫情嘅經濟重創而宣佈投降。

霸戲哥身為港島人，點會冇去過蓮香，但印象中都唔超過5次，主要係價錢太貴啦，畀班慕名而來嘅旅客炒到貴晒。

蓮香樓啲嘢食係OK嘅，記得每次都食肥叉飯，舊叉燒唔會太燶身，最重要係成條上，夾住嚟咬勁霸氣。當然佢哋招牌嘅豬膶燒賣、蓮蓉包都會嗌，但其實我麻麻哋。去得蓮香樓，都係貪佢陣舊式茶樓氣氛，一盅兩件，水滾茶靚。每次有點心出爐，茶客蜂擁而上，雖然肚餓但都客客氣氣。以前去得幫襯嘅都有陣儒雅味，唔少係大編輯、老總，嚟嘆茶唞唞氣。

因為蓮香樓嘅歷史，自然成為電影嘅取景地，印象最深刻一定係陳果嘅《去年煙花特別多》。何華超戲中飾演被遣散嘅華籍英兵，感覺被時代遺棄。臨尾去到蓮香樓同班靚仔講數，情感大爆發，立刀亂劈班蠱惑仔，成為經典場口之一。

《去年煙花特別多》係陳果「回歸三部曲」嘅第二部，原來都已經24年前嘅事。過去會過去的，蓮香樓都不能例外。