霸戲哥之日常#358｜ 蓮香樓

蓮香樓結業，又一間百年老店抵受唔住疫情嘅經濟重創而宣佈投降。

霸戲哥身為港島人，點會冇去過蓮香，但印象中都唔超過5次，主要係價錢太貴啦，畀班慕名而來嘅旅客炒到貴晒。

蓮香樓啲嘢食係OK嘅，記得每次都食肥叉飯，舊叉燒唔會太燶身，最重要係成條上，夾住嚟咬勁霸氣。當然佢哋招牌嘅豬膶燒賣、蓮蓉包都會嗌，但其實我麻麻哋。去得蓮香樓，都係貪佢陣舊式茶樓氣氛，一盅兩件，水滾茶靚。每次有點心出爐，茶客蜂擁而上，雖然肚餓但都客客氣氣。以前去得幫襯嘅都有陣儒雅味，唔少係大編輯、老總，嚟嘆茶唞唞氣。

因為蓮香樓嘅歷史，自然成為電影嘅取景地，印象最深刻一定係陳果嘅《去年煙花特別多》。何華超戲中飾演被遣散嘅華籍英兵，感覺被時代遺棄。臨尾去到蓮香樓同班靚仔講數，情感大爆發，立刀亂劈班蠱惑仔，成為經典場口之一。

《去年煙花特別多》係陳果「回歸三部曲」嘅第二部，原來都已經24年前嘅事。過去會過去的，蓮香樓都不能例外。

霸戲哥

** 博客文章文責自負,不代表本公司立場 **

今日收到舊同事嘅囍帖，先醒起原來真係好耐冇去過飲宴，呢個新冠疫情真係搞到港人陀陀擰，擺酒大日子都要一改再改。

咁橋今晚J2節目《開火》主題係婚宴食品，楊尚友教大家煮邪惡嘅龍蝦伊麵。咪住先，霸戲哥見識少，乜婚宴有龍蝦伊麵呢道菜式嘅咩？

講起港式嘅龍蝦伊麵，酒樓食開來來去去都係兩款：上湯龍蝦伊麵，同埋芝士龍蝦伊麵。邊款好食啲？呢個問題，同蛋撻揀酥皮定牛油皮一樣，只會引發世界大戰。不過霸戲哥怕食芝士，所以如果有得話事嗰餐，都係食上湯版。

節目介紹嘅呢道「邪惡龍蝦伊麵」，就係用極重芝士加牛油溝香檳做個芡，隔住個芒都見到好creamy，鍾意食芝士嘅讀者應該舔舔脷，但霸戲哥就麻麻。不過，Christian將隻龍蝦剝晒殼，再一刀刀將啲龍蝦肉切成一小塊，呢個小小舉動當堂加滿分，因為霸戲哥認為食龍蝦最驟忌就係要剝殼。

寫到有啲餓，拿拿聲入廚房淥番個龍蝦杯麵食先。