泛民中青代發「本土宣言」 被傘兵圍插

由教院學者方志恒發起的一份《香港前途決議文》宣言，獲超過30名不同泛民主派團體的中青年一代聯署，但一出就俾傘兵組織圍插，和這份宣言劃清界線。

這份《香港前途決議文》宣言其實都幾激，就香港前途提出四點主張，包括提倡由香港人透過民主授權和有約束力的機制，自行決定204 7年後的香港政治地位，並認為「永續自治」將會是恰當選擇。

宣言又提到，「非暴力抗爭」包括議會抗爭、佔領、罷工、罷市等， 能凝聚大多數人認同，應是爭取政治革新的主流方法。參與聯署的包括教院學者方志恒、公民黨陳淑莊和楊岳橋、 民主黨林立志、民協何啟明等。

宣言出街後，由於有網站誤將聯署團體包括本土民主前線、 香港眾志和青年新政，幾個團體就借機發難，和宣言劃清界線。 本土民主前線發聲明，話無簽署過宣言，又否認自己是泛民一員， 話一個獨立而自由的香港，才可以成為香港人真正的歸宿，要求宣言聯署發起人馬上澄清。

政壇八卦友慨嘆，將佔領都當成「非暴力抗爭」(有無暴力睇你點佔 )，港人「內部自決，永續自治」等，都算幾激進啦。 不過香港發展到今天，你略有少少保留，就俾人話「你老餅啦， 你都唔夠激，死開啦你」。可以預見，當民主黨搞出它的本土主張後，下場亦一樣，會被激進派圍插， 兩面不討好。

Ariel

** 博客文章文責自負,不代表本公司立場 **

港鐵自4月起推出「開心搭．生日獎」優惠活動， 每個月抽出一個日子，然後在那日生日的乘客可以領取車票， 享一日免費任搭等生日禮物。計條數一年生日一次，但由於只是30 抽1(當平均每月30日計)，即使當月生日乘客也只有30份1機會中獎。

港鐵主席馬時亨搵到汪明荃汪阿姐，昨日在港鐵香港站抽獎， 結果抽到5月17日為呢個月幸運日子。但汪阿姐總會讓人有驚喜， 佢同肥馬講：「而家搭車咁貴，呢個優惠有幾多人受惠？ 受惠嘅人得好少喎，票價減少少仲好啦！」肥馬立刻回應讚阿姐「 提供好多意見」。阿姐再斬四兩話：「我嚟梗係要畀意見啦， 唔係費事嘥時間嚟……係咪好後悔請我嚟呢？」

阿姐事後仲同傳講，港鐵車費貴，話「搞呢啲活動開支貴， 又唔係咁多人受惠，減價好啲，或者出糧後嗰日全港免費搭車， 一日都好呀。」

政壇八卦友話，阿姐做嘉賓做到咁坦白，世間少有。 除咗佢急民之所急外，恐怕港鐵也只是揼心口叫佢來幫手， 無俾或者俾咗好少酬金，所以阿姐就暢所欲言，順便抽水。 想當年汪阿姐幫海馬牌床褥賣廣告時，佢唔會話「 啲床褥請我賣廣告咁貴，不如減價好啲。」