郝鐵川調回內地

中聯辦宣傳文體部部長郝鐵川一向以高調見稱，聞說呢位高調部長已經離職，有可能重過學者生涯。

郝鐵川本來就係法律學者出身，曾任華東政法學院副院長，後轉入政府，任上海市委宣傳部副部長，之後搞完京奧，09年調來香港，做中聯辦宣傳文體部部長。

中聯辦的宣傳文體部雖然管宣傳，但部門阿頭過去並不高調，但郝部長作風唔同，來港約晤各大傳媒，廣交朋友，又不時出席講座，並在報章撰文。佢工作勤力，久不久會在午夜打電話發短訊俾傳媒主管，搞到大家都要一段時間先至適應得到。

今次郝部長都走得幾急，未知是否有個人因素，但一直和郝部長關係良好、靠他食糊的媒體，突然唔見咗佢，就肯定有得震無得瞓啦。

Ariel

** 博客文章文責自負,不代表本公司立場 **

亞記爆出「搣柴」執行董事雷競斌大戰主要投資者王征的鬧劇，聞說最後都係俾錢的投資者大聲啲，雷會放大假。消息指雷競斌做高級副總裁時與亞視係簽咗份好長的死約，如果要即時炒佢，分分鐘鐘賠過百萬，但其後再委任他兼任「執行董事」就並非呢份死約的內容，即係搣柴冇得做執董係唔需要賠錢的，所以他的執董一職應難保。

據講雷競斌曾經與另一大股東黃炳均對過咀，有人話會「善待」雷請番來的親信，但今日早上一名雷手下得力助手，總裁辦公室統籌主任胡錦波已被炒魷，而且係由保安員睇住執嘢即走。而雷競斌已向通訊局書面投訴，力數王征點樣干預亞視管理層運作，另一場大戲等住上演。

 

口痕友都奇怪，話晒人稱「吔叔」的雷競斌都係打工仔一名，王征想話租亞視頻道俾王維基，吔叔又點解可以公開唔聽老細的決定嘅？

呢個怪局要由亞記財困講起，近幾年幾乎CUT晒所有的不必要開支，製作費亦都有限，如果唔係都唔會俾網民笑重播又重播，主要投資者王征曾表示過去幾年已投入超過13億經營亞視，日日係咁蝕，邊個老細唔頭大呀，加上近年內地房地產市場不景，主要喺內地經營房產的王征更加一頭煙啦。

據聞吔叔出任執董後，四出撲水，最後搵到人借千多萬番來，俾亞記周轉，最近亞記都有啲動作，好似係先後派出兩派攝製隊，兩次前往烏克蘭、吉爾吉斯等中亞地方，探討顏色革命對呢啲前蘇聯加盟共和國的影響力，前幾日烏克蘭變天時，剛好亞視有攝製隊喺現場，唔講可能唔知，呢啲中亞地區雖然落後，但作為外來人要去一啲都唔容易亦唔平，使費更係吓吓講美金，少個錢都難搞，閒閒地咁去一去都使成幾十萬架，力主要搞呢個節目就係吔叔。

睇嚟雖然做伙計，但撲到水，對住老細講嘢都真係大聲啲，之但係又咁，雖然話搵到水，都可能係一啲口頭承諾，到真係要「磅」水時，對方係唔係大方呢，又係一件事，而且，據聞亞記月月蝕二、三千萬，真係撲幾多嚟填至夠呀！

爆出大鑊後，吔叔都相信好難再留任執董，但佢去通訊局投訴王征干預，據了解，吔叔手上有文件同內部通告證明投訴成立，通訊局如果介入調查，相信到時又會另一場風波了。