霸戲哥之日常#366｜ 終極渣男

Netflix已經由「動漫台」變成「奇案台」，全球各地大小複雜奇案，遲早都會畀N記製作成紀錄片。呢類奇案片或者滿足到部份觀眾嘅獵奇心態，但同時都有令人極度不安嘅能耐，奉勭大家心情差時千祈咪睇。

最新一齣令人情緒低落嘅犯罪紀錄片叫《終極網絡渣男》，故事圍繞美國一名混球Hunter Moore嘅「渣」行，同埋受害者嘅遭遇。Hunter被冠為「網上最討厭男人」，佢2010年經營一個名為「Is Anyone Up?」嘅色情網站，起初係畀啲分手情侶發淫照報仇嘅平台，慢慢演變成欺凌同性勒索（Sextortion）嘅網站。Hunter利用網民嘅好奇心同獵奇心，不停散佈淫照同淫片，大部份都係未經當事人同意。情形有多少似轟動韓國嘅「N號房事件」。

除咗Hunter嘅獸行令人反感之外，套紀錄片仲有好多令人不安嘅影片，霸戲哥越睇越嬲，更加唔明點解啲女仔咁愚蠢，任由啲渣男擺佈。

都係嗰句，做女仔一定要學識保護自己。

霸戲哥

** 博客文章文責自負,不代表本公司立場 **

霸戲哥以為王祖藍主持嘅《有個閨密叫祖藍》，咪又係一般嘅訪談節目，所以起初都冇乜特別關注。噚晚因為嘉賓係Fiona，而咁啱英超頭場又悶悶哋，就轉台過去睇咗陣。祖藍的確係有計，起碼撬得開Fiona把口，令對方放下戒心，坦誠講出心底話。某程度上，亦幫到對方釋放自己。

咪畀Fiona個後生樣呃到，其實佢都出道近20年，霸戲哥「細細個」就聽佢啲歌，佢隻《'F' Debut》CD依家仲喺舊屋企。當然佢首《奇洛李維斯回信》最出名，但霸戲哥更愛《麥當娜一吻》，當年失意時日loop夜loop。

Fiona一直被塑造成大笑姑婆形象，拍嘅戲多數搞笑為主，但經驗話畀我哋知，表面上越開心嘅人（尤其女藝人），就越容易患上情緒病。好不幸地，Fiona亦唔例外，喺佢最唔開心嘅時候，曾經諗過尋死，係方大同救番佢一命。

但要克服情緒，身邊人最多只可以幫你一把，最重要都係靠自己。依家諗番轉頭，其實周耀輝填嘅《麥當娜一吻》已經講晒。