霸戲哥之日常#368｜ J2監察站(26)：陀飛輪

唔經唔覺，奶仔方紹聰主持嘅《貧窮限制想像》今晚嚟到最後一集，呢兩個幾月入面，霸戲哥嘅想像力係豐富咗，可惜荷包依舊係薄切切。

成日話男人最愛三樣嘢：名車、名錶、女人。頭兩樣霸戲哥都唔好，女人有豬視妹一個已經嫌多，又或者可能貧窮限制咗想像啦。而最後一集，奶仔就帶觀眾玩名錶同名車。

陀飛輪大家聽得多，其實陀飛輪即係咩？陀飛輪係法文Tourbillon嘅音譯，係瑞士鐘錶大師Abraham-Louis Breguet喺1975年發明嘅鐘錶調查裝置。普通嘅機械錶，因為會受到金屬疲勞同地心吸力嘅影響，會造成誤差。陀飛輪有螺旋調速結構，年誤差係少於1秒。不過表芯原材料同啲機件好多都係瑞士原產，閒閒哋都百萬起標，窮L又點玩得起。

霸戲哥認為戴錶只得兩個用途——睇時間、同埋睇notification，所以幾千蚊隻Apple Watch已經夠做。至於啲人炒撈都可以致富，霸戲哥真係冇呢個本事嘞。

霸戲哥

** 博客文章文責自負,不代表本公司立場 **

霸戲哥自細對豬肉麻麻，唯獨鍾情燒豬，所以細個最鍾意去兩種場合—婚宴同拜山，咪就係為咗食乳豬同燒肉囉。當然敗家如我，都鍾意食酒樓嘅燒腩仔，但因為太貴，唔到你話想食就有。依家每次食燒腩仔，都會感受到霸戲媽嘅皇恩浩蕩，係滿足的味道。

一嚿平平無奇又唾手可得嘅燒肉，背後原來有好大學問。黎諾懿主持嘅飲食節目《滿足的味道》噚晚播出第一集，主題就係講燒肉。燒肉好唔好，基本上睇賣相已經知，而點解老字號嘅燒肉店咁多年味道始終如一？除咗食材，最重要就係烹調方法。

黎諾懿帶觀眾走訪幾間老字號，睇吓啲師傅點樣整燒豬。原來要燒到變「芝麻皮」，就一定要喺320度高溫爐燒，最傳統做法係用炭燒，但因為要領牌，所以炭燒嘅燒肉已經買少見少。

最可惜係，已經冇乜新人肯入行，因為燒豬實在太辛苦，晨早五點起身開爐不得止，又要企喺熱爐側邊左轉右轉，最慘就係年終無休。

依家每食到好味嘅燒豬都要感恩，或者以後冇機會再食到呢種味道。